ఎంసీహెచ్​లో పొమ్మన్నరు.. సీహెచ్​సీలో ప్రాణం పోశారు..

• కొత్తగూడెంలోని పెద్దాసుపత్రిలో డెలివరీలకు వెళ్తే ఖమ్మం, వరంగల్​ వెళ్లమంటున్రు
• స్కానింగ్, బ్లడ్​ టెస్ట్​ల కోసం ప్రయివేట్​ల్యాబ్​లకు వెళ్లాల్సిందే.. 
• కరెంట్​ఉండదు.. జనరేటర్​ పనిచేయదు.. రిపేర్​లో ఇన్వర్టర్​ 
• ఇబ్బందుల్లో గర్భిణులు.. ఉన్నతాధికారులు పట్టించుకోవాలని విజ్ఞప్తి 

భద్రాద్రికొత్తగూడెం, వెలుగు : జిల్లా కేంద్రమైన కొత్తగూడెంలోని పెద్దాసుపత్రి(ఎంసీహెచ్​)లో డెలివరీ కోసం వెళ్తే పొమ్మన్నారు. అర్జెంట్​గా ఖమ్మం, వరంగల్​ వెళ్లకపోతే తల్లీబిడ్డకు ప్రాణాపాయం అని ఎంసీహెచ్​ డాక్టర్లు ఖరాఖండిగా చెప్పారు. దీంతో డెలివరీ కోసం వచ్చిన గర్భిణీ కుటుంబానికి మతిపోయింది. చివరకు పాల్వంచలోని గవర్నమెంట్​ హాస్పిటల్​ (సీహెచ్​సీ)కు తీసుకెళ్లారు. అక్కడ ఆపరేషన్​ చేశారు. తల్లీబిడ్డ క్షేమంగా ఉండడంతో ఆ కుటుంబ సభ్యులు ఊపిరి పీల్చుకున్నారు. కాగా ఎంసీహెచ్​లో కరెంట్​ లేదు. జనరేటర్​ పనిచేయడం లేదు. ఆపరేషన్​ థియేటర్​లోని ఇన్వర్టర్​ రిపేరులో ఉంది. స్కానింగ్, ఎక్స్​రేలతో పాటు బ్లడ్​ టెస్టుల కోసం ప్రైవేటుకు వెళ్లాల్సిన పరిస్థితి నెలకొంది.

పేరుకే పెద్దాసుపత్రి.. 

జిల్లాలోని పీహెచ్​సీలు, సీహెచ్​సీల్లో డెలివరీ కోసం వచ్చే గర్భిణులకు ఏదైన క్రిటికల్​ ప్రాబ్లం వస్తే జిల్లా కేంద్రమైన కొత్తగూడెం పట్టణం రామవరంలోని మాతా, శిశు ఆరోగ్య(ఎంసీహెచ్​) కేంద్రానికి పంపిస్తారు. కానీ ఎంసీహెచ్​కు ప్రసవాలకు వచ్చే వారిని ఖమ్మం, వరంగల్​ వెళ్లమంటున్నారు. లేకపోతే ప్రయివేట్​ హాస్పిటళ్లలో చూపించుకోవాలని చెబుతున్నారు, దీంతో పేరుకే పెద్దాసుపత్రి అని, సౌకర్యాలేవీ లేవని నిరుపేద గర్భిణులు ఆవేదన వ్యక్తం చేస్తున్నారు. గవర్నమెంట్​ హాస్పిటళ్లలో ప్రసవాలను ప్రోత్సహించాలని ఓ వైపు ప్రభుత్వం చెబుతుంటే ఎంసీహెచ్​లో మాత్రం డెలివరీ కోసం వచ్చే వారిని ఇతర ప్రాంతాలకు పంపిస్తుండడం గమనార్హం. 

ఇదీ పరిస్థితి..

పెనగడపలో నివసిస్తున్న ప్రయివేట్​ఎలక్ట్రీషియన్​ సాల్మన్​ఖాన్​ తన భార్య నౌషీన్​ను డెలివరీ కోసం పుట్టిల్లైన మణుగూరుకు పంపించారు. కానీ రామవరంలోని ఎంసీహెచ్​లో ట్రీట్​మెంట్​తీసుకుంటున్నారు. ఈ నెల 10న డెలివరీ కోసం వెళ్తే ‘ అర్జెంట్​ ఏమీ లేదు.. దసరా పండుగ తర్వాత రాండి..’ అని వారికి డాక్టర్లు సూచించారు. దీంతో నౌసీన్​ ఈనెల 14న హాస్పిటల్​కు వచ్చారు. సిజేరియన్​ చేయాల్సి ఉందని, దానికి ఇంకా టైమ్​ ఉందని, మరో రెండు రోజులు ఆగి రావాలని సిబ్బంది వారికి చెప్పి ఇంటికి పంపించారు. 

ఈ క్రమంలో బుధవారం ఉదయాన్నే ఎంసీహెచ్​కు డెలివరీ కోసం నౌషీన్​ వచ్చారు. స్కానింగ్​ హాస్పిటల్​లో లేదని సిబ్బంది చెప్పడంతో నౌషీన్​ ప్రయివేట్​హాస్పిటల్​కు వెళ్లి  రూ. 2,500 ఖర్చు పెట్టి తీసుకొచ్చారు. రూ. 300 పెట్టి బ్లడ్​ టెస్ట్​ కూడా బయటే చేయించారు. 

తీరా హాస్పిటల్​కు వస్తే కరెంట్​ లేదని, జనరేటర్​ పనిచేయడం లేదని, ఇన్వర్టర్ రిపేర్​లో ఉందని, దీంతో తమరు అర్జెంట్​గా ఖమ్మం కానీ, వరంగల్​ కానీ వెళ్లాలని, లేకపోతే తల్లీబిడ్డకు ప్రమాదమని డాక్టర్లు చెప్పడంతో నౌషీన్​ కుటుంబసభ్యులు ఆందోళన చెందారు. దిక్కుతోచని పరిస్థితిలో పాల్వంచలోని కమ్యూనిటీ హెల్త్​ సెంటర్​(సీహెచ్​సీ)కు నౌషీన్​తీసుకెళ్లారు. అక్కడి డాక్టర్లు ఆమెకు ఇన్​టైంలో ఆపరేషన్​ చేసి తల్లీబిడ్డలను కాపాడారు. 

ఇల్లెందుకు చెందిన ప్రియాంక మంగళవారం రాత్రి డెలివరీ కోసం కొత్తగూడెంలోని ఎంసీహెచ్​కు వచ్చారు. ‘ఇక్కడ డెలివరీ చేసే పరిస్థితి లేదు. ఖమ్మం తీసుకెళ్లాలి’ అని వైద్య సిబ్బంది సూచించారు. దీంతో అప్పు చేసి కుటుంబ సభ్యులు ఆమెను రాత్రికి రాత్రే ఖమ్మం తీసుకెళ్లారు. ఎంసీహెచ్​కు వచ్చే గర్భిణులకు పట్టణంలోని ప్రయివేట్​ హాస్పిటల్స్​కు వెళ్లాలని సూచించడం, లేదంటే ఖమ్మం, వరంగల్​కు వెళ్లాలని చెబతుండడంపై ప్రజలు అసహనం వ్యక్తం చేస్తున్నారు. 

పెద్దాసుపత్రిలో తగ్గుతున్న డెలివరీలు..

పట్టణం రామవరంలోని ఎంసీహెచ్​లో నెలనెలా డెలివరీల సంఖ్య తగ్గుతోంది. రోజుకు 15 నుంచి 20 వరకు జరిగే ప్రసవాలు ప్రస్తుతం 10కి పడిపోవడం గమనార్హం. సౌకర్యాలు ఏవీ లేకపోవడంతో ప్రైవేట్​కు కానీ, ఇతర ప్రాంతాలకు కానీ వెళ్లాల్సి వస్తుండంతో ప్రజలు ఆర్థిక భారంతో ఇబ్బంది పడుతున్నారు. మందులు కూడా పూర్తి స్థాయిలో అందుబాటులో ఉండడం లేదు. అత్యవసర సమయంలో ఉపయోగించే వెంటిలేటర్స్​ కూడా సరిగా పనిచేయకపోవడంతో పేషెంట్లకు అవస్థలు తప్పడం లేదు. 

కరెంట్​సమస్య పరిష్కరిస్తాం.. 

ఎంసీహెచ్​లో కరెంట్​ సప్లైలో  ప్రాబ్లం ఉంది. జనరేటర్​ పనిచేయడం లేదు. హైదరాబాద్​ నుంచి వచ్చి రిపేర్​ చేయాల్సి ఉంది. ఎలక్ట్రిసిటీ వాళ్లు సమస్య పరిష్కారం కోసం కృషి చేస్తున్నారు. ఈ క్రమంలో ఎక్కవ మందిని ఇతర హాస్పిటళ్లకు రెఫర్​ చేస్తున్నాం. రాజ్​కుమార్, మెడికల్​కాలేజ్​ప్రిన్సిపాల్, భద్రాద్రికొత్తగూడెం