జ్యోతినగర్, వెలుగు: నిత్య పెళ్లి కూతురు చేతిలో పెద్దపల్లి జిల్లా రామగుండం జ్యోతినగర్కు చెందిన ఓ యువకుడు మోసపోయిన ఘటన ఆలస్యంగా బయటకొచ్చింది. ఎన్టీపీసీ అన్నపూర్ణ కాలనీకి చెందిన సుద్దాల రేవంత్ గతంలో ఓ యువతిని పెండ్లి చేసుకుని విడాకులు తీసుకున్నాడు. కాగా వరంగల్ జిల్లా నెక్కొండకు చెందిన మెండె అనూష పరిచయమైంది. 2022 డిసెంబర్ లో ఇరు కుటుంబాల సమక్షంలో చిలుకలయ్య గుడిలో పెండ్లి జరిగింది. కొద్ది రోజులకే తన భార్య లిక్కర్, సిగరెట్లు తాగుతున్నదని రేవంత్ ఆరోపించడంతో ఇద్దరి మధ్య గొడవలు జరిగాయి.
కొన్ని రోజుల తర్వాత తన అక్క వసంత ఇంటికి వెళ్తున్నానని చెప్పి 4 తులాల బంగారం , రూ.70 వేలను తీసుకొని వెళ్లింది. తర్వాత ఫోన్ చేస్తే స్విఛ్ ఆఫ్ రావడంతో నెక్కొండలో స్నేహితుల వద్ద ఆమె గురించి రేవంత్ ఆరా తీశాడు. దీంతో అనూషకు ఇదివరకే ఇద్దరి వ్యక్తులతో పెళ్లైందని తెలుసుకొన్నాడు. తాను మోసపోయానని జూన్ 3న అనూష పై ఎన్టీపీసీ పోలీసు స్టేషన్ లో కేసు పెట్టాడు. విషయం తెలుసుకున్న అనూష తిరుమలగిరికి రమ్మని రేవంత్కు లోకేషన్ పంపింది. రేవంత్ అక్కడికి వెళ్లడంతో ఆమె స్నేహితులతో కలిసి దాడి చేసింది. దీంతో ఆమెతో ప్రాణహాని ఉందని సోమవారం మీడియాతో వాపోయాడు.
