మళ్లీ తెరమీదకు డబుల్​ బెడ్​ రూం ఇండ్లు

•     అర్హులను గుర్తించే పనిలో అధికారులు
•     పాతకేటాయింపులో అవకతవకలు
•     గతంలో జిల్లాకు శాంక్షన్​ అయినవి 3394
•     పూర్తయినవి 262, కడుతున్న ఇండ్లు 1669
•     స్థలం లేక పునాదులు తీయనివి1463

పెద్దపల్లి, వెలుగు : పెద్దపల్లిలో నిర్మాణం పూర్తయిన డబుల్​ బెడ్​ రూం ఇండ్లను పంపిణీ చేయడానికి పెద్దపల్లి ఎమ్మెల్యే విజయరమణారావు రెడీ అయ్యారు.   గత రెండు రోజుల క్రితం పెద్దపల్లి,  చందపల్లిలో నిర్మాణం పూర్తయిన ఇండ్లను ఆయన పరిశీలించారు.  గత సర్కార్​ టైంలో లబ్ధిదారుల ఎంపికలో అవకతవకలు జరిగాయని  బాధితులు అప్పుడు  కలెక్టర్​కు ఫిర్యాదు చేశారు. దీంతో  లబ్ధిదారుల ఎంపిక  ప్రక్రియ ఆగిపోయింది.

కట్టిన డబుల్​ బెడ్​ రూం ఇండ్లను పంపిణీ చేయడం కోసం అసలైన  లబ్ధిదారులను గుర్తించాలని అధికారులకు సూచించారు.  తాగునీరు, కరెంటు, డ్రైనేజీ వసతులను వెంటనే  కల్పించాలని  ఆదేశించారు.   అప్పటి సర్కార్​  పెద్దపల్లి జిల్లాకు 3394 డబుల్​ బెడ్​రూం ఇండ్ల నిర్మాణానికి అనుమతులిచ్చింది.

తొమ్మిదేండ్ల నుంచి కొనసాగుతున్న పనులు 

తొమ్మిదేళ్ల క్రితం  డబుల్​ ఇండ్ల పనులు ప్రారంభం అయ్యాయి. అప్పటి నుంచి  ఇప్పటి వరకు కేవలం  262 మాత్రమే పూర్తయ్యాయి.  ఇంకా  1669 ఇండ్లను కడుతుండగా..   1463 ఇండ్లకు పునాదులు కూడా తీయలేదు.  జిల్లాలోని 14 మండలాలకు  మంథని మండలంలో 92, కాల్వ శ్రీరాంపూర్​లో 170 మాత్రమే పూర్తయ్యాయి. పెద్దపల్లి, సుల్తానాబాద్​, రామగుండం మండలాల్లో నిర్మాణాలు స్లోగా జరుగుతున్నాయి. ధర్మారం అర్బన్​, మంథని అర్బన్​   ప్రాంతాల్లో స్థలం లేక ఇప్పటికీ పనులు చేపట్టలేదు. డబుల్​ బెడ్​రూం ఇండ్లు కట్టడానికి కాంట్రాక్టర్లు ముందుకొస్తలేరు.

ప్రభుత్వం కేటాయించిన  నిర్మాణాలకు సరిపోతలేదు. నిర్మాణ వ్యయం పెరిగింది, జీఎస్టీ లాంటి ట్యాక్స్​లతో చాలా ప్రాంతాల్లో కాంట్రాక్టర్లు ఆసక్తి చూపుత లేరు. ఒక్క డబుల్​ బెడ్​రూం ఇంటికి రూ. 5.30 లక్షలు సర్కార్​ కేటాయించింది. ఇంటికి 6 శాతం చొప్పున జీఎస్టీ కట్టాలి. ఒక్కో ఇంటికి  రూ. 30 వేలు జీఎస్టీ కింద పోతుంది. ఈ విధంగా 1000 ఇండ్లు కట్టాలంటే కాంట్రాక్టర్​ జీఎస్టీ కింది రూ. 3 కోట్లు చెల్లించాల్సి వస్తుంది. దీంతో డబుల్​ బెడ్​రూం ఇండ్లు నిర్మించడానికి ఏ కాంట్రాక్టర్​ ధైర్యం చేయడం లేదు. 

కట్టినయి పంపిణీ...

కట్టిన   ఇండ్లు పంపిణీ చేసేందుఉ  కాంగ్రెస్​ ఎమ్మెల్యేలు సిద్ధమవుతున్నారు.  డబుల్​ ఇండ్లకు కావాల్సిన కరెంటు, తాగునీరు, డ్రైనేజీ నిర్మాణాలు వెంటనే జరిగేలా చూడాలని అధికారులను ఆదేశిస్తున్నారు.  గత సర్కార్​లో నాయకులు ఎక్కడ మీటింగ్​ పెట్టినా డబుల్​ బెడ్​రూం ఇండ్లు పేదలకు పంచుతున్నట్లు చెప్పుకున్నరు. కానీ పెద్దపల్లి జిల్లాలో పూర్తయిన ఇండ్లు కూడా పేదలకు అందజేయలేదు. పెద్దపల్లి జిల్లా కేంద్రంతో పాటు కాల్వశ్రీరాంపూర్​ మండల కేంద్రంలో కొన్ని ఇండ్లు పూర్తయ్యాయి. కనీసం వాటినైనా అర్హులైన పేదలకు అందించాలని కొత్త సర్కార్​ నిర్ణయించింది. 

నియోజకవర్గాల్లో ఇదీ తీరు.. 

నియోజకవర్గం     కేటాయించినవి    పూర్తయినవి 

పెద్దపల్లి                        1454                  170
రామగుండం                 1260                    0
మంథని                           650                   92