నిజామాబాద్, వెలుగు : అమలు సాధ్యంకాని హామీలను బాండ్ పేపర్లపై రాసి కాంగ్రెస్ లీడర్లు కొత్త మోసానికి తెరలేపారని ఎమ్మెల్సీ కవిత విమర్శించారు. మంగళవారం నిజామాబాద్లో మీడియాతో మాట్లాడారు. తెలంగాణలో కేసీఆర్ గవర్నమెంట్ ఏర్పడ్డాక 2.32 లక్షల ఉద్యోగాలకు నోటిఫికేషన్లు ఇచ్చి 1.6 లక్షలు భర్తీ చేశామన్నారు. కర్నాటక ఎలక్షన్లో 223 సీట్లలో పోటీ చేసిన కాంగ్రెస్ అభ్యర్థులు బాండ్ పేపర్లపై హామీలు రాసి ఓట్లు దండుకున్నారని చెప్పారు.
తెలంగాణలో కూడా కొందరు కాంగ్రెస్ లీడర్లు కేవలం ఓట్ల కోసమే బాండ్ పేపర్ల రాస్తున్నారని, వాటిని నమ్మి మోసపోవద్దన్నారు. అధికారంలోకి వచ్చిన వెంటనే కొత్త రేషన్ కార్డులు జారీ చేస్తామని తెలిపారు. మరోసారి కేసీఆర్ గవర్నమెంట్ వస్తేనే ప్రజలందరికీ మంచి జరుగుతుందన్నారు. ఈ కార్యక్రమంలో అభ్యర్థి షకీల్, రెడ్కో మాజీ చైర్మన్ అలీముద్దీన్ తదితరులు ఉన్నారు.
