- రాత్రి 2 గంటలకు పిల్లలను పేరెంట్స్ రోడ్లపైకి ఎట్ల పంపిస్తరు
- ‘గేమ్ ఛేంజర్’ టికెట్ల పెంపు ఉత్తర్వులపై 24 గంటల్లో పునఃసమీక్షించండి
- వాళ్ల స్థానంలో మీరుంటే ఇలాగే చేస్తారా?.. ప్రజల భద్రతకు మొదటి ప్రాధాన్యత ఇవ్వాలి
- టికెట్ల రేట్ల పెంపుపై మధ్యంతర ఉత్తర్వులు జారీ
హైదరాబాద్, వెలుగు: గేమ్ ఛేంజర్ సినిమా టికెట్ ధరలు పెంచుకునేందుకు అనుమతిస్తూ జారీ చేసిన ఉత్తర్వులపై 24 గంటల్లో పునఃసమీక్షించి నిర్ణయం తీసుకోవాలని రాష్ట్ర ప్రభుత్వానికి హైకోర్టు ఆదేశాలు జారీ చేసింది. ఏ నిబంధన ప్రకారం టికెట్ రేట్లు పెంచారో పేర్కొనలేదని తెలిపింది. రాత్రి పడుకోవాల్సిన టైమ్లో సినిమాలేంటని ప్రశ్నించింది. నిబంధనలు ఉల్లంఘిస్తే రాత్రి 11 గంటల తర్వాత థియేటర్లు, పబ్ల మూసివేతకు ఆదేశాలిస్తామని హెచ్చరించింది. తెల్లవారు జామున షోలకు అనుమతించరాదని ప్రభుత్వాన్ని ఆదేశించింది. విచారణను ఈనెల 28కి వాయిదా వేసింది.
గేమ్ చేంజర్‌ సినిమా అదనపు షోలు, టికెట్ ధరలను పెంచుతూ జారీ చేసిన ఉత్తర్వులను సవాల్ చేస్తూ హైకోర్టులో 3 పిటిషన్‌‌‌‌లు దాఖలయ్యాయి. వీటిపై జస్టిస్‌ బీ.విజయ్‌‌‌‌సేన్‌ రెడ్డి శుక్రవారం విచారించారు. అదనపు షోల పేరుతో ప్రభుత్వం పర్మిషన్ ఇవ్వడాన్ని తప్పుబట్టారు. బెనిఫిట్‌ షోలకు ప్రభుత్వం.. పరోక్షంగా పర్మిషన్ ఇచ్చిందన్నారు. ‘‘రాత్రి పడుకోవాల్సిన టైమ్లో సినిమాలు ఏంటి? అర్ధరాత్రి 2 గంటలు దాటిన తర్వాత పిల్లలను రోడ్లపై తిరగడానికి తల్లిదండ్రులు ఎలా అనుమతిస్తారు? 16 ఏండ్లలోపు వారికి అర్ధరాత్రి దాటాక సినిమాలు, పబ్‌‌‌‌ల్లోకి అనుమతించరాదని ఉత్తర్వులివ్వాల్సి ఉంటుంది’’అని హెచ్చరించారు.
రోజుకు 4 షోలకే అనుమతి ఉంటది
అంతకుముందు పిటిషనర్‌ తరఫు అడ్వకేట్ వాదిస్తూ..‘‘చట్ట ప్రకారం రోజుకు 4 షోలకు అనుమతించాల్సి ఉంది. సంధ్య థియేటర్‌ ఘటన తర్వాత బెనిఫిట్‌ షోలకు అనుమతి ఇవ్వమని ప్రభుత్వం ప్రకటించింది. అయితే, ఉదయం 4 గంటల నుంచి 6 గంటల షోకు అనుమతించారు’’అని కోర్టుకు వివరించారు. కోర్టు జోక్యం చేసుకుని.. ‘‘సినిమా ఇప్పటికే విడుదలైనందున బెనిఫిట్‌ షోలపై ఉత్తర్వులివ్వలేం’’అని తెలిపారు.
దీనికి అడ్వకేట్ స్పందిస్తూ.. పెంచిన టికెట్ ధరలు ఈ నెల 11 నుంచి 19వ తేదీ వరకు మాత్రమే అమల్లో ఉంటాయని పేర్కొన్నారు. ప్రభుత్వం తరఫున అడ్వకేట్ వాదిస్తూ.. మల్టీప్లెక్స్‌‌‌‌ల్లో, సింగిల్‌ థియేటర్‌‌‌‌లలో 5 షోల వరకు అనుమతించవచ్చన్నారు. ఇరుపక్షాల వాదనలను విన్న జడ్జి.. టికెట్ల ధరలపై ప్రభుత్వమిచ్చిన ఉత్తర్వులను 24 గంటల్లో పునఃసమీక్షించాలని ఆదేశించారు.
