మహబూబాబాద్ జిల్లాలో మోడల్​ మార్కెట్​ ఏమాయే

• రూ.5.61 కోట్లతో సమీకృత మోడల్​మార్కెట్ నిర్మాణం
• నూతన మార్కెట్ ను వినియోగంలోకి తీసుకురావాలంటున్న ప్రజలు
• అపరిశుభ్రత నడుమ వీధులలోనే వ్యాపారాల నిర్వహణ

మహబూబాబాద్, వెలుగు: మహబూబాబాద్ జిల్లా కేంద్రంలో రూ.5.61 కోట్లతో అధునాతన వసతులతో నిర్మించిన మోడల్ మార్కెట్ (సమీకృత వెజ్, నాన్​వెజ్, ఫ్రూట్స్, ఫ్లవర్​మార్కెట్) ను ఏండ్లు గడిచినా వినియోగంలోకి తీసుకురావడంలేదు. గతంలో పనులు పూర్తి కాకముందే అప్పటి మున్సిపల్​శాఖ మంత్రి కేటీఆర్​హడావుడిగా 2023లో మే30న ఈ మార్కెట్​ను ప్రారంభించారు. అప్పటికే పనులు పూర్తి కాకపోవడం, కాంట్రాక్టర్​కు బిల్లులు రాకపోవడంతో పెండింగ్ పనుల పూర్తి చేసేందుకు టైం పట్టింది. ఇటీవల పెండింగ్​పనులు పూర్తైనా మోడల్​మార్కెట్​మాత్రం వినియోగంలోకి రావడం లేదు. దీంతో చిరు వ్యాపారులు రోడ్లపైనే కొనసాగిస్తున్నారు.

మోడల్​ మార్కెట్​ నిర్మాణం పూర్తయినా..

2021లో అప్పటి ప్రభుత్వం జిల్లా కేంద్రంలోని కొత్త బజార్ లో మూడు బ్లాకుల్లో సమీకృత మార్కెట్ నిర్మాణం చేపట్టింది. రాష్ట్రప్రణాళికా సంఘం, పట్టణ ప్రగతి, 14వ ఆర్థికసంఘం, పురపాలక సాధారణ నిధులు, ఎస్ డీఎఫ్ పథకాల ద్వారా నిధులు రూ.5.61 కోట్లు నిధులుమంజూరయ్యాయి. సకాలంలో  ఫండ్​ విడుదల కాకపోవడంతో కాంట్రాక్టర్​ ఆలస్యంగా పనులు ప్రారంభించారు. చేసిన పనులకు బిల్లులు రానందున కాంట్రాక్టర్ నిర్మాణ పనులను నిలిపివేశారు. 

ఇతర పథకాల ద్వారా నిధులు చెల్లించినా, సరిపోవడం లేదంటూ 20 శాతం పనులను వదిలివెళ్లారు. పూర్తిగా పనులు కాకముందే 2023 మే30న అప్పటి మంత్రి కేటీఆర్ భవనాన్ని ప్రారంభించారు. మోడల్ మార్కెట్ ఖాళీగా ఉండడంతో మద్యం ప్రియులకు, అసాంఘిక కార్యక్రమాలకు అడ్డాగా మారింది. మరోవైపు గాంధీ పార్కులో తాత్కాలిక కూరగాయల మార్కెట్​నిర్వహిస్తుండగా, సభలు, వాకింగ్, క్రీడలకు వినియోగించాల్సిన పార్కు స్థలాన్ని ఖాళీ చేయాలని ప్రజలు డిమాండ్​ చేస్తున్నారు.​

మోడల్​మార్కెట్ సముదాయం ఇలా..

బ్లాక్ -1లో :  కూరగాయలు, ఇతర దుకాణాలకు 38 గదులు. బ్లాక్-2లో : మాంసాహార విక్రయాలకు 37 గదులు. బ్లాక్-3లో : పూలు, పండ్లుదుకాణాలకు 37 గదులు కేటాయించడానికి నిర్ణయించారు. ఇటీవల మహబూబాబాద్ ఎమ్మెల్యే మురళీనాయక్ మోడల్ మార్కెట్​ను పరిశీలించి, అసంపూర్తి పనులు, మార్కెట్​లోకి కోతులు రాకుండా ఐరన్ గ్రిల్స్ ఏర్పాటు చేయాలని సూచించారు. 

సీడీఎఫ్ నుంచి రూ.90 లక్షలు మంజూరు చేశారు. ప్రస్తుతం మార్కెట్​పనులు పూర్తయ్యాయి. కొందరు ప్రజాప్రతినిధులు, అధికారుల మధ్య వివాదంతో మోడల్​మార్కెట్​వినియోగంలోకి రావడం లేదు. షాపుల కేటాయింపులో అనుకూలమైన గదులు కేటాయిస్తామని కొందరుదళారులు వ్యాపారుల నుంచి డబ్బులు వసూలుచేస్తున్నారు. అందరి సమక్షంలో డ్రాపద్ధతిలో దుకాణాలు కేటాయిస్తే వివాదాలుఉండవని చిరు వ్యాపారులు కోరుతున్నారు. సమీకృత మార్కెట్​ను వినియోగంలోకి తీసుకురావడానికి ప్రజాప్రతినిధులతో చర్చించి తగిన చర్యలు తీసుకుంటామని మున్సిపల్​కమిషనర్ రవీందర్  తెలిపారు.

మోడల్​ మార్కెట్​ను వినియోగంలోకి తీసుకురావాలి

మహబూబాబాద్​జిల్లా కేంద్రంలో ప్రజల కోసం కోట్ల నిధులు వెచ్చించి నిర్మించిన ఇంటిగ్రేటెడ్ మోడల్​మార్కెట్​ను నిరుపయోగంగా ఉంచడం తగదు. వీధుల్లో అపరిశుభ్ర వాతావరణంలో కూరగాయలు, నాన్​వెజ్, పూలు, పండ్లు కొనుగోలు చేయవలసి వస్తుంది. మోడల్​మార్కెట్​ను తక్షణం వినియోగంలోకి తీసుకురావాలి. 

షేక్​ సలీమా,గృహిణి, మిలటరీ కాలనీ, మహబూబాబాద్​