- భారత్ బ్రాండ్ రైస్పై ఇంట్రెస్ట్ చూపని జనం
- ఒకసారి కొనుగోలు చేశాక మళ్లీ కొనట్లేదు
- విక్రయ కేంద్రాలు సిటీలో చాలా తక్కువే
- రిలయన్స్ మార్ట్, కొన్ని ఔట్లెట్ల్లోనే లభ్యం
- ఈ – కామర్స్ ఫ్లాట్ ఫామ్స్ లో దొరకడంలేదు
హైదరాబాద్, వెలుగు: బహిరంగ మార్కెట్ లో రోజురోజుకు పెరిగిపోయే బియ్యం, నిత్యావసరాల ధరలను దృష్టిలో పెట్టుకొని కేంద్రప్రభుత్వం ఎంతో ప్రతిష్టాత్మకంగా తీసుకొచ్చిన భారత్బ్రాండ్రైస్ పై జనాలు పెదవి విరుస్తున్నారు. మార్కెట్లో కిలో రూ. 29 కే అమ్ముతుండగా బియ్యం దొడ్డుగా ఉంటున్నాయని, వండిన తర్వాత అన్నం ముక్కవాసన వస్తుందని పేర్కొంటున్నారు. ఒకసారి కొనుగోలు చేసినవారు మరోసారి తీసుకునేందుకు ఆసక్తి చూపించడంలేదు. రైస్అమ్మకాలపైనా.. అవి ఎక్కడ దొరకుతాయనేది కూడా చాలామందికి తెలియడంలేదు. ఈ స్కీమ్ ను అమల్లోకి తెచ్చేందుకు విస్తృతంగా ప్రచారం చేసిన కేంద్రం పంపిణీ మాత్రం సరిగా చేయడంలేదు. గత ఫిబ్రవరి 7న నుంచి భారత్ రైస్ ను కేంద్ర ప్రభుత్వం మార్కెట్లోకి తెచ్చింది. లోక్ సభ ఎన్నికలను దృష్టిలో పెట్టుకొనే కేంద్రం తెచ్చిందనే విమర్శలు ఉన్నాయి.
సామాన్యులకు అందుబాటులో ఉండాలని..
ఓపెన్ మార్కెట్లో బియ్యం ధరలు ప్రస్తుతం ప్రీమియం క్వాలిటీ రైస్ కిలోరూ.60 పలుకుతుంది. దీంతో సామాన్యులకు అందుబాటులో ఉండడంలేదు. మంచి బియ్యం అందించాలనే ఉదేశంతో కిలో రూ. 29కే కేంద్ర ప్రభుత్వం భారత్ రైస్ను మార్కెట్ లోకి తీసుకొచ్చింది. అదేవిధంగా భారత్ గోధుమ పిండి, శనగ పప్పు కూడా అమ్ముతుండగా.. ఎక్కువగా కొనుగోలు చేస్తున్నారు. నిత్యవసరాల్లో ఎక్కువగా వాడే వంట నూనె, నాణ్యమైన బియ్యం, కంది పప్పు వంటివి కూడా భారత్ బ్రాండ్ ద్వారా తక్కువ ధరలకు అందించాలని జనం కోరుతున్నారు.
ఎక్కడ అమ్ముతున్నరో తెలియట్లేదు
భారత్ బ్రాండ్సరుకులను అమ్మే బాధ్యతను నేషనల్‌ అగ్రికల్చరల్‌ కో – ఆపరేటివ్‌ మార్కెటింగ్‌ ఫెడరేషన్‌ ఆఫ్ ఇండియా(నాఫెడ్), నేషనల్‌ కో – ఆపరేటివ్‌ కన్స్యూమర్ ఫెడరేషన్‌ ఆఫ్ ఇండియా(ఎన్‌‌సీసీఎఫ్‌), కేంద్రీయ భండార్‌ వంటి సంస్థలకు కేంద్ర ప్రభుత్వం అప్పగించింది. సిటీలో మాత్రం ఎక్కడో ఒక చోట ఇవి దొరుకుతున్నాయి. కొన్ని రిలయన్స్మార్ట్ల్లో, ఇంకొన్ని ఔట్ లెట్లలో మాత్రమే వీటిని అమ్ముతున్నట్టు ప్రజలకు తెలియడం లేదు. మరికొన్ని స్టోర్లలో భారత్దాల్, భారత్అట్టామాత్రమే లభిస్తున్నాయి. ఇలా భారత్ బ్రాండ్సరుకులను ప్రైవేట్స్టోర్లలో కాకుండా రేషన్షాపుల ద్వారా అందిస్తే సామాన్యులకు అందుబాటులో ఉంటాయని ప్రజలు కోరుతున్నారు. కేంద్రం కూడా ఆన్లైన్లో కూడా వీటి విక్రయాలను ప్రారంభిస్తామని ప్రకటించింది. కానీ, ఇప్పటివరకు అమెజాన్, ఫ్లిఫ్కార్ట్, జియో మార్ట్ ఈ– కామర్స్ఫ్లాట్ఫామ్స్ లోనూ దొరకడంలేదు.
అన్నం మంచిగా ఉంటలే
వారం కిందట భారత్ బ్రాండ్ రైస్కొనుగోలు చేశా. బియ్యం చూస్తే సన్నగా కనిపిస్తున్నాయి. కానీ వండిన తర్వాత అన్నం దొడ్డుగా ఉంటుంది. అన్నం కూడా ముక్క వాసన వస్తుంది. కేంద్రం ఇస్తుంది కదా.. బాగానే ఉంటాయనుకోగా.. ఊహించినతంగా లేదు. – టి.రాఘవేందర్, ప్రైవేట్ఎంప్లాయ్, లంగర్హౌజ్
రేషన్ బియ్యంతో పోల్చుకుంటే వ్యత్యాసం ఉంటది
20 రోజుల నుంచి భారత్బ్రాండ్రైస్ను తెలంగాణలో ఇస్తున్నం. సిటీలో మొత్తం 26 విక్రయ కేంద్రాలు ఉన్నాయి. 5 వేల మెట్రిక్ టన్నుల పంపిణీ చేయాల్సిఉండగా వెయ్యి వరకే ఇచ్చాం. త్వరలో టార్గెట్ను పూర్తి చేస్తం. అన్ని నాణ్యతా ప్రమాణాలను పాటించే బియ్యాన్ని సరఫరా చేస్తున్నం. రేషన్బియ్యాన్నే పాలిష్ చేసి ఇస్తున్నం. కానీ చాలా వ్యత్యాసం ఉంటది. రేషన్బియ్యంలో 25శాతం నూక ఉంటుంది. భారత్రైస్ లో ఉండదు. రైస్ దొడ్డుగా ఉంటున్నాయనే కంప్లయింట్స్ రాలేదు. వస్తే పరిశీలించి చర్యలు తీసుకుంటాం.
– వినయ్కుమార్, నాఫెడ్హెడ్ తెలంగాణ, ఏపీ
