టికెట్ల రేట్లను సినిమా ఖర్చును బట్టి నిర్ణయించరు

• కాస్త ప్రేక్షకుల గురించి కూడా ఆలోచించండి వర్మ గారూ
• సౌకర్యాల ఆధారంగానే టికెట్ రేట్లు నిర్ణయించాలి
• సినిమా ఒక వస్తువు కాదు.. వినోద సేవ మాత్రమే
• దోచుకోకుండా ఆపితే నెత్తిన ఎక్కి తొక్కినట్టా?

ఏపీలో సినిమా టికెట్ల అంశం రోజుకో మలుపు తిరుగుతోంది. టికెట్ల ధరలను జగన్ సర్కారు తగ్గిస్తూ తీసుకున్న నిర్ణయంపై సినీ పెద్దల నుంచి అసంతృప్తి వ్యక్తమవుతోంది. టికెట్ రేట్ల విషయంపై వివాదాస్పద దర్శకుడు ఆర్జీవీ రెండు రోజుల క్రితం పలు కీలక వ్యాఖ్యలు చేశారు. తన ప్రశ్నలకు సమాధానాలు చెప్పాలంటూ ఏపీ సినిమాటోగ్రఫీ మంత్రి పేర్ని నానిపై ప్రశ్నల బాణాలు వేశారు. తాజాగా ఆ ప్రశ్నలన్నింటికి  మంత్రి పేర్ని నాని ట్విట్టర్ వేదికగా జవాబు చెబుతూ.. ఆర్జీవీని కొన్ని ప్రశ్నలు అడిగారు. 

 రూ.100 టికెట్ ను రూ.1000కి, 2000కి అమ్ముకోవచ్చని ఏ చట్టం చెప్పిందని మంత్రి ప్రశ్నించారు. రేట్లు పెంచుకోవడాన్ని డిమాండ్ & సప్లై అంటారా? లేక బ్లాక్ మార్కెటింగ్ అంటారా? అని ఎద్దేవా చేశారు. టికెట్ల రేట్లను సినిమా ఖర్చును బట్టి ఏ ప్రభుత్వం నిర్ణయించదని ఆయన అన్నారు. టికెట్ ధరలతో సామాన్యుడిని దోచుకోకుండా ఆపితే మీ నెత్తిన ఎక్కి తొక్కినట్టు అని మీరు మాట్లాడటం సబబేనా అని నాని ప్రశ్నించారు.

‘గౌరవనీయులైన ఆర్జీవీ గారూ... మీ ట్వీట్లు చూశాను. నాకు ఉన్న సందేహాన్ని తెలియపరుస్తున్నాను. రూ.100 టికెట్ ను రూ.1000కి, 2000కి అమ్ముకోవచ్చని ఏ బేసిక్ ఎకనమిక్స్ చెప్పాయ్? ఏ చట్టం చెప్పింది? దీన్ని ఏ మార్కెట్ మెకానిజం అంటారు? డిమాండ్ & సప్లై అంటారా? లేక బ్లాక్ మార్కెటింగ్ అంటారా?

సామాన్యుడి మోజుని, అభిమానాన్ని లూఠీ చేసే పరిస్థితి లేకుండా చూసేందుకు అన్ని రాష్ట్ర ప్రభుత్వాలు 66 ఏళ్ళుగా చట్టాలకు లోబడే సినిమా టికెట్ ధరను నిర్ణయిస్తున్నాయి.

ఉప్పూ పప్పూ లాంటి నిత్యావసర వస్తువుల ధరల్ని మాత్రమే ప్రభుత్వం నియంత్రించవచ్చుగానీ, సినిమా టికెట్ల ధరల్ని ప్రభుత్వం ఎలా నిర్ణయిస్తుందని అడిగారు. థియేటర్లు అనేవి ప్రజా కోణంలో వినోద సేవలు పొందే ప్రాంగణాలు.

బలవంతంగా ధరలు తగ్గిస్తే మోటివేషన్‌ పోతుందన్నది ఎకనామిక్స్‌లో ప్రాథమిక సూత్రం అని చెప్పారు. ఎవరికి వర్మగారూ?  కొనేవారికా? అమ్మేవారికా? మీరు ఎంతవరకు ప్రొడ్యూసర్స్‌ శ్రేయస్సు గురించే మాట్లాడుతూ కన్స్యూమర్ యాంగిల్‌ను గాలికి వదిలారు. కాస్త ప్రేక్షకుల గురించి కూడా ఆలోచించండి వర్మ గారూ.

సినిమాను అత్యవసర సర్వీసుగా ప్రభుత్వం భావిస్తుంటే... మెడికల్, ఎడ్యుకేషన్‌ మాదిరిగానే సబ్సిడీని ప్రభుత్వం భరించాలని అడిగారు. సినిమాను మేం నిత్యావసరంగా గానీ, అత్యవసరంగా గానీ భావించటం లేదు ఆర్జీవీ గారూ.

థియేటర్‌లో సినిమా టికెట్ల ధరల్ని ప్రేక్షకులకు కల్పించే సౌకర్యాల ఆధారంగా నిర్ణయించాలని మాత్రమే 1970 సినిమాటోగ్రఫీ చట్టం ద్వారా వచ్చిన నిబంధనలు చెపుతున్నాయి.

హీరోలకు నిర్మాతలు ఇచ్చే రెమ్యూనరేషన్‌కు ఒక ఫార్ములా చెప్పారు. మీరు ఏ హీరోకు ఎంత ఇస్తారు? ఎంత ఖర్చుతో సినిమా తీస్తారు అన్నది పరిగణనలోకి తీసుకుని ఏనాడూ థియేటర్లలో టికెట్ల ధరను ఏ రాష్ట్ర ప్రభుత్వమూ నిర్ణయించదు ఆర్జీవీ గారూ.

ఒక వస్తువుకు సంబంధించిన మార్కెట్‌ ధర నిర్ణయంలో అసలు ప్రభుత్వానికి ఉన్న పాత్ర ఏమిటో సమాధానమివ్వండని అడిగారు. సినిమా ఒక వస్తువు కాదు.అది వినోద సేవ మాత్రమే.ప్రజల్ని దృష్టిలో ఉంచుకుని మేం చేస్తున్నది థియేటర్లలో టికెట్‌ ధరల నియంత్రణ మాత్రమే తప్ప, సినిమా నిర్మాణ నియంత్రణ ముమ్మాటికీ కాదు.

మీకు కింది నుంచి మద్దతు ఇవ్వటానికి ప్రజలు మాకు అధికారాన్ని ఇచ్చారని, మీ నెత్తిన ఎక్కి తొక్కటానికి కాదన్నారు. సినిమా టికెట్‌ను ఎంతకైనా అమ్ముకోనిస్తే పరిశ్రమకు కింది నుంచి బలాన్ని ఇచ్చినట్టు, సామాన్యుడిని దోచుకోకుండా ఆపితే మీ నెత్తిన ఎక్కి తొక్కినట్టు మీరు ప్రవచించటం సబబేనా వర్మ గారూ?’

For More News..

పక్షుల కోసం రూ. 20 లక్షలతో బర్డ్ హౌస్

కరోనా టాబ్లేట్ @ రూ. 35