హైదరాబాద్, వెలుగు: రాష్ట్రంలో ఎంటెక్, ఎంఈ, ఎంఫార్మసీ తదితర కోర్సుల్లో అడ్మిషన్ల కోసం నిర్వహించే పీజీఈసెట్ పరీక్షలు ప్రారంభమయ్యాయి. సోమవారం రెండు సెషన్లలో ఎగ్జామ్స్ జరిగాయి. మార్నింగ్ సెషన్లో జియో ఇంజినీరింగ్ అండ్ జియో ఇన్ఫర్మేటిక్స్, ఫార్మసీ కోర్సులకు పరీక్షలు జరగ్గా 7,461 మందికి గాను 7,179 (96.22%) మంది అటెండ్ అయ్యారని పీజీఈసెట్ కన్వీనర్ అరుణకుమారి తెలిపారు.
మధ్యాహ్నం సెషన్లో సివిల్ ఇంజినీరింగ్, ఎలక్ర్టికల్ ఇంజినీరింగ్, ఫుడ్ టెక్నాలజీ, ఏరోస్పెస్ ఇంజినీరింగ్ తదితర కోర్సులకు ఎగ్జామ్స్ జరిగాయని, దీంట్లో 5,477 మందికి గాను 4,898 (89.43%) అటెండ్ అయ్యారని చెప్పారు. ఈ పరీక్షలను హయ్యర్ ఎడ్యుకేషన్ కౌన్సిల్ చైర్మన్ ప్రొఫెసర్ లింబాద్రి, కౌన్సిల్ సెక్రటరీ శ్రీరామ్ వెంకటేశ్, జేఎన్టీయూ రెక్టార్ ప్రొఫెసర్ విజయకుమార్ రెడ్డి, రిజిస్ట్రార్ వెంకటేశ్వరరావు పర్యవేక్షించారు.
