పుణె : ప్రొ కబడ్డీ లీగ్ 11వ సీజన్‌‌లో ప్లే ఆఫ్స్ ముంగిట తెలుగు టైటాన్స్ తడబడింది. సోమవారం జరిగిన లీగ్ మ్యాచ్‌‌లో టైటాన్స్ 25–46- తేడాతో గత సీజన్‌ రన్నరప్ హర్యానా స్టీలర్స్‌ చేతిలో చిత్తయింది. స్టీలర్స్‌ తరఫున శివమ్‌ పతారె (12 పాయింట్లు), వినయ్‌ (7 పాయింట్లు), మహ్మద్‌ రెజా (5 పాయింట్లు)రాణించారు.
తెలుగు టైటాన్స్ జట్టులో ఆశీష్‌ నర్వాల్‌ సూపర్‌ టెన్‌‌తో మెరిసినా ఫలితం లేకపోయింది. లీగ్‌‌లో 18 మ్యాచ్‌‌ల్లో ఎనిమిదో ఓటమితో టైటాన్స్ ఆరో ప్లేస్‌‌కు పడిపోయింది. 18 మ్యాచ్‌‌ల్లో 14వ విజయంతో హర్యానా టాప్ ప్లేస్‌‌లో కొనసాగుతోంది. మరో మ్యాచ్‌‌లో దబాంగ్ ఢిల్లీ 30–26తో పుణెరి పల్టాన్‌‌పై గెలిచింది.
