ముంబై: రాష్ట్రంలో అభివృద్ధిని అడ్డుకోవడంలో ప్రతిపక్షాలు పీహెచ్ డీ చేశాయని ప్రధాని మోదీ అన్నారు. కాంగ్రెస్ అయితే ఇందులో డబుల్ పీహెచ్డీ చేసిందని ఎద్దేవా చేశారు. ఉద్ధవ్ థాక్రే, అతడి కూటమి నేతలు అవినీతిలో ఆరితేరారని, రాష్ట్ర ప్రగతికి అవరోధంగా నిలుస్తున్నారని మండిపడ్డారు. మంగళవారం మహారాష్ట్రలోని చంద్రాపూర్ జిల్లా చిమూర్లో నిర్వహించిన బీజేపీ ఎన్నికల ర్యాలీలో మోదీ పాల్గొని, ప్రసంగించారు. మహా వికాస్ అఘాడీ కూటమి మహారాష్ట్రకు హానికరమని పేర్కొన్నారు. చంద్రాపూర్ ప్రజలు రైల్ కనెక్టివిటీ కావాలని ఏండ్లుగా కోరుతున్నారని, కానీ.. కాంగ్రెస్, అఘాడీ నేతలు అది జరగకుండా చేశారని తెలిపారు.
మహారాష్ట్రలో బీజేపీ, శివసేన (షిండే), ఎన్సీపీ(అజిత్పవార్) కూటమి అధికారంలో ఉండడం.. డబుల్ ఇంజిన్ సర్కారు కావడంతో అభివృద్ధి వేగంగా జరిగిందని చెప్పారు. ఈ డెవలప్మెంట్ను అడ్డుకునేందుకు ప్రతిపక్షాలు ప్రయత్నిస్తున్నాయని అన్నారు. రెండున్నరేండ్లలో రాష్ట్రం వేగంగా అభివృద్ధి చెందడాన్ని ప్రజలంతా చూశారని, అత్యధిక విదేశీ పెట్టుబడులు ఈ రాష్ట్రానికే వచ్చాయని వివరించారు. మహారాష్ట్ర గడ్డపై 12 వందే భారత్ రైళ్లు నడుస్తున్నాయని, 100 రైల్వే స్టేషన్లను ఆధునికీకరించామని చెప్పారు. కొత్త విమానాశ్రయాలు కూడా అందుబాటులోకి వచ్చాయని వెల్లడించారు. అలాగే, బీజేపీ మేనిఫెస్టో రాబోయే ఐదేండ్లలో మహారాష్ట్రకు వికాస్ గ్యారంటీగా మారుతుందని చెప్పారు.
ప్రజలంతా ఐక్యంగా ఉండాలి
తాము దేశాన్ని పాలించేందుకే పుట్టామని షాహీ పరివార్ (కాంగ్రెస్ రాజకుటుంబం) భావిస్తున్నదని, మానసికంగా అలా ఫిక్స్ అయిపోయిందని ప్రధాని మోదీ ఎద్దేవా చేశారు. స్వాతంత్ర్యానంతరం అణగారిన వర్గాల అభివృద్ధిని కాంగ్రెస్ అడ్డుకున్నదని అన్నారు. ఎస్సీ, ఎస్టీ, బీసీల అభివృద్ధికి ఏనాడూ కృషిచేయలేదని ఆరోపించారు. ఇప్పుడు కూడా ఆదివాసీల కమ్యూనిటీని విచ్ఛిన్నం చేయాలని ఆ పార్టీ కోరుకుంటున్నదని అన్నారు. ‘‘మీ ఐక్యతను దెబ్బతీయాలని కాంగ్రెస్ యత్నిస్తున్నది. ఆ పార్టీ కుట్రను భగ్నం చేసేందుకు ప్రజలంతా ఐక్యంగా ఉండాల్సిన అవసరం ఉంది” అని పేర్కొన్నారు.
ఎంవీఏలో సీఎం సీటు కోసం పోటీ
మహా వికాస్ అఘాఢీ (ఎంవీఏ)లో డ్రైవర్ (సీఎం) సీటుకోసం అందరూ పోటీపడుతున్నారని ప్రధాని మోదీ ఎద్దేవా చేశారు. షోలాపూర్లో నిర్వహించిన బీజేపీ ఎన్నికల ర్యాలీలో మోదీ ప్రసంగించారు. ఆ కూటమిలో ఓ పార్టీ సీఎం అభ్యర్థులను నిర్ణయించడంలో బిజీగా ఉంటే.. ఆ నిర్ణయాన్ని తిరస్కరించడంలో కాంగ్రెస్ బిజీగా ఉంటున్నదని అన్నారు. ఇలాంటి స్థితిలో ఉన్నవారితో సుస్థిర ప్రభుత్వ ఏర్పాటు సాధ్యం కాదని తెలిపారు. దేశాన్ని దశాబ్దాలపాటు కాంగ్రెస్ పాలించినా.. ఇంకా ఎన్నో సమస్యలు అపరిష్కృతంగానే ఉన్నాయని, ఇదే వారి పని సంస్కృతి అని విమర్శించారు.
కాంగ్రెస్ పనితీరుతో మహారాష్ట్ర రైతులు ఎన్నో ఏండ్లుగా నష్టపోతున్నారని అన్నారు. ఈ ప్రాంతంలో కాంగ్రెస్, దాని మిత్రపక్షాలు నీటిపారుదల సమస్యను పరిష్కరించడంలో విఫలమయ్యాయని తెలిపారు. కానీ, తమ సర్కారు ఈ సమస్యకు పరిష్కారం చూపించిందని, ఇందుకు షోలాపూర్లో పెరుగుతున్న నీటిమట్టాలే నిదర్శనమని మోదీ పేర్కొన్నారు. మహారాష్ట్రలో మహాయుతి కూటమితోనే సుస్థిర ప్రభుత్వ ఏర్పాటు సాధ్యమని తెలిపారు.
