- 140 కోట్ల భారతీయుల ఆకాంక్షలు నెరవేరుస్తది: ప్రధాని మోదీ
- సామాన్యుల జేబులు నింపడంపైనే మా దృష్టి
- పన్ను చెల్లింపుల రూపంలో భారీ ఊరట ఇచ్చినం
- వచ్చే వారం బిల్లు పెట్టి ట్యాక్స్ విధానాన్ని సులభతరం చేస్తం
- అణు ఇంధన రంగంలో పెట్టుబడులకు తలుపులు తెరిచాం
- యువతకు ఉపాధి అవకాశాలు మెరుగుపడ్తాయని వ్యాఖ్య
న్యూఢిల్లీ: కేంద్ర ప్రభుత్వం ప్రవేశపెట్టిన బడ్జెట్.. ‘ప్రజా బడ్జెట్’అని ప్రధానమంత్రి నరేంద్ర మోదీ అన్నారు. ఈ బడ్జెట్.. వికసిత్ భారత్ లక్ష్యాన్ని ముందుకు తీసుకెళ్లేందుకు ఎంతో తోడ్పడుతుందని తెలిపారు. 140 కోట్ల మంది భారతీయుల ఆకాంక్షలను నెరవేర్చే బడ్జెట్ అని కొనియాడారు. కేంద్ర మంత్రి నిర్మలా సీతారామన్ లోక్సభలో బడ్జెట్ ప్రవేశపెట్టిన తర్వాత ప్రధాని మోదీ వీడియో రిలీజ్ చేశారు. ‘‘నిర్మలా సీతారామన్ ప్రవేశపెట్టిన బడ్జెట్.. పెట్టుబడులను పెంచుతుంది. ఇండియా డెవలప్మెంట్ జర్నీలో ఇదొక కీలకమైన మైలు రాయి. ఈ బడ్జెట్ ప్రతీ భారతీయుడి కలను నెరవేరుస్తుంది. అనేక రంగాల్లో యువతకు కొత్త అవకాశాలు లభిస్తాయి. సామాన్యులే వికసిత్ భారత్ మిషన్‌‌‌‌‌‌‌‌ను ముందుకు తీసుకువెళ్లేలా ఈ బడ్జెట్ తోడ్పడుతుంది. సాధారణంగా ప్రభుత్వ ఖజానాను ఎలా నింపాలన్నదానిపై బడ్జెట్ ఫోకస్‌ ఉంటుంది. కానీ.. ఈ బడ్జెట్ సామాన్యుల జేబులు ఎలా నింపాలన్నదానిపై దృష్టి పెట్టి రూపొందించినది’’అని ప్రధాని నరేంద్ర మోదీ అన్నారు.
50 టూరిస్ట్ స్టేషన్లలో హోటళ్లు నిర్మిస్తం
షిప్ల తయారీ రంగంలో చాలా మందికి ఉపాధి లభిస్తుందని ప్రధాని మోదీ వివరించారు. 50 కీలకమైన టూరిస్ట్ స్టేషన్లలో హోటళ్లను నిర్మిస్తామన్నారు. మౌలిక సదుపాయాల పరిధిలోకి హోటళ్లను తీసుకురావడంతో టూరిజం సెక్టార్కు ఎంతో ప్రోత్సాహం లభిస్తుందని వివరించారు. ‘‘అణు ఇంధన రంగంలో ప్రైవేట్‌ పెట్టుబడులకు తలుపులు తెరవడం లాంటి చర్యలు ఈ బడ్జెట్లో తీసుకువచ్చిన గొప్ప సంస్కరణ. హాస్పిటాలిటీ సెక్టార్కు ఈ బడ్జెట్ సరికొత్త ఎనర్జీ ఇస్తుంది. అదేవిధంగా, యువతకు ఉపాధి అవకాశాలు లభిస్తాయి’’అని ప్రధాని మోదీ అన్నారు. గిగ్ వర్కర్ల విషయంలో సామాజిక భద్రత కల్పించామని తెలిపారు. తాము తీసుకున్న ఈ నిర్ణయం.. గిగ్ వర్కర్ల గౌరవం పట్ల ఉన్న నిబద్ధతను తెలియజేస్తుందని అన్నారు.
పన్ను చెల్లింపుల్లో 7 శ్లాబులు తీసుకొచ్చినం
పన్ను చెల్లింపుల రూపంలో మధ్య తరగతి ప్రజలకు తమ ప్రభుత్వం ఎంతో ఊరట ఇచ్చిందని ప్రధాని మోదీ అన్నారు. రూ.12 లక్షల ఆదాయం వరకు ఎలాంటి ట్యాక్స్ చెల్లించాల్సి ఉండదని తెలిపారు. పన్నుల చెల్లింపుల్లోనూ 7 శ్లాబులు తీసుకొచ్చామన్నారు. దీంతో మధ్య తరగతి ప్రజల వద్ద సేవింగ్స్ పెరుగుతాయని తెలిపారు. ‘‘ఆదాయ పన్ను విధానంలో సంస్కరణలకు కీలక ముందడుగు వేశాం. వచ్చే వారం ఆదాయ పన్నుపై బిల్లును తీసుకొస్తాం. ఈ బిల్లు ఆదాయ పన్ను విధానాన్ని మరింత సులభతరం చేస్తుంది. టూరిజం, హాస్పిటాలిటీ సెక్టార్ల అభివృద్ధికి ఎంతో దోహదపడుతుంది. షిప్ బిల్డింగ్, మెరైన్టైమ్ ఇండస్ట్రీస్, దేశ వ్యాప్తంగా ఉన్న రైతుల ఆర్థిక బలోపేతానికి ఊతం ఇస్తుంది. బడ్జెట్లో అన్ని రంగాలకు ప్రాధాన్యత ఇచ్చాం. రాబోయే కొన్నేండ్లలో ఆర్థిక రంగంలో ఎన్నో కీలక సంస్కరణలు తీసుకొస్తాం. భారీ నౌకల నిర్మాణ పరిశ్రమను ప్రోత్సహిస్తాం’’అని ప్రధాని మోదీ అన్నారు.
