- వర్చువల్‌‌‌‌గా ప్రారంభించనున్న ప్రధాని నరేంద్ర మోదీ
- దేశవ్యాప్తంగా పలు రైల్వే ప్రాజెక్టులు, రెండు రైళ్లు కూడా
న్యూఢిల్లీ/ సికింద్రాబాద్, వెలుగు: ఆధునిక సౌకర్యాలతో నిర్మించిన చర్లపల్లి రైల్వే టెర్మినల్‌‌‌‌ను ప్రధాని నరేంద్ర మోదీ సోమవారం ప్రారంభించనున్నారు. ఉదయం ఢిల్లీ నుంచి వర్చువల్‌‌‌‌గా ఈ టెర్మినల్‌‌‌‌ను ప్రారంభించనున్నారు. దీంతో పాటు పలు రైల్వే ప్రాజెక్టులకు ప్రారంభోత్సవాలు, శంకుస్థాపనలు చేయనున్నట్లు ఆదివారం పీఎంవో ఒక ప్రకటనలో వెల్లడించింది. అమృత్ భారత్ కార్యక్రమంలో భాగంగా ఈ టెర్మినల్‌‌‌‌ను రూ.413 కోట్లతో నిర్మించారు. టెర్మినల్ ఓపెనింగ్ కార్యక్రమానికి రాష్ట్ర గవర్నర్ జిష్ణుదేవ్ వర్మ, సీఎం రేవంత్ రెడ్డి, కేంద్ర రైల్వే మంత్రి అశ్విని వైష్ణవ్, కేంద్ర మంత్రులు కిషన్ రెడ్డి, బండి సంజయ్, రాష్ట్ర మంత్రి శ్రీధర్ బాబు, మేయర్ జయలక్ష్మి, ఎంపీ ఈటల రాజేందర్ తదితరులు హాజరుకానున్నారు.
పలు రైళ్లకు చర్లపల్లిలో హాల్టింగ్
చర్లపల్లి నుంచి ప్రధాని మోదీ రెండు సూపర్ఫాస్ట్ ఎక్స్ప్రెస్ రైళ్లను కూడా ప్రారంభించనున్నారు. అలాగే సోమవారం నుంచి ఇక్కడ కొన్ని రైళ్లకు కొత్తగా హాల్టింగు ఇచ్చారు. ఇప్పటి వరకు ట్రైన్ నంబరు 12603 చెన్నై–సికింద్రాబాద్ పేరుతో నడుస్తున్న రైలు ఈ నెల 7 నుంచి ట్రైన్ నంబరు 12603 చెన్నై సెంట్రల్–చర్లపల్లి పేరుతో నడవనుంది. ట్రైన్ నంబరు 12604 సికింద్రాబద్-చెన్నై సెంట్రల్ రైలు, ట్రైన్ నంబరు 12604-చర్లపల్లి-చెన్నై సెంట్రల్ సూపర్ ఫాస్ట్ ఎక్స్ ప్రెస్ ఈ నెల 8 నుంచి ఇక్కడి నుంచే ప్రయాణికులకు అందుబాటులో ఉండనుంది. ఇప్పటి వరకు ఈ రైళ్లు సికింద్రాబాద్ రైల్వే స్టేషన్ నుంచి ప్రారంభమై చెన్నై సెంట్రల్ కు వెళ్లేవి. ఇక 7వ తేదీ నుంచి ఈ రెండు రైళ్లు ఇక్కడ నుంచే ప్రయాణీకులకు అందుబాటులో ఉంటాయి.
అలాగే ఇప్పటి వరకు ట్రైన్ నంబరు 12589 గోరక్ పూర్–-సికింద్రాబాద్ రైలు ఇక నుంచి గోరక్ పూర్-–చర్లపల్లి పేరుతో .. ట్రైన్ నంబరు 12590 సికింద్రాబాద్–గోరక్ పూర్రైలు ఇక నుంచి ట్రైన్నంబర్12590 చర్లపల్లి–-గోరక్ పూర్ ఎక్స్ ప్రెస్ గా.. ఈ నెల 12, 13 తేదీల నుంచి చర్లపల్లి టెర్మినల్ నుంచే ప్రయాణికులకు అందుబాటులో ఉంటాయి. అలాగే సికింద్రాబాద్-–సిర్పూర్ కాగజ్ నగర్, సిర్పూర్ కాగజ్నగర్–సికింద్రాబాద్-ఎక్స్ ప్రెస్, గుంటూరు -సికింద్రాబాద్, సికింద్రాబాద్ -గుంటూరు ఎక్స్ ప్రెస్ రైళ్లకు చర్లపల్లి టెర్మినల్ లో ఆగుతాయి.
