- హైవేకు ప్రధాని శంకుస్థాపన
- జిల్లాలో 25 కి.మీ పొడవునా రహదారి
- మూడు భాగాలుగాఎకనామిక్ కారిడార్
కోల్బెల్ట్/జైపూర్, వెలుగు : ప్రధానమంత్రి గతిశక్తి పథకం కింద నాగ్పూర్-– విజయవాడ ఎకనామిక్ కారిడార్లో భాగంగా వరంగల్–-మంచిర్యాల జాతీయ రహదారికి ప్రధాని నరేంద్రమోదీ శనివారం శంకుస్థాపన చేయనున్నారు. ఈ హైవేను రూ.3,441 కోట్లతో నిర్మిస్తునారు. దీనితో మహారాష్ట్ర, తెలంగాణ, ఏపీ రాష్ట్రాల మధ్య దూరం తగ్గనుంది.
-మంచిర్యాల- –వరంగల్ మధ్య 112 కి.మీ
మంచిర్యాల-–వరంగల్ గ్రీన్ఫీల్డ్స్ హైవే పొడవు 112 కి.మీ ఉంటుంది. వరంగల్, పెద్దపల్లి, భూపాలపల్లి, మంచిర్యాల జిల్లాల మీదుగా ఈ రహదారి వెళ్తుంది. హైవేకు కేంద్రం 2021 మార్చిలో గ్రీన్ సిగ్నల్ ఇచ్చింది. జిల్లాలో మంచిర్యాల –-చెన్నూరు నేషనల్ హైవే 63ను ఆనుకొని జైపూర్ మండలంలోని రసూల్పల్లి పక్క నుంచి ఎస్టీపీపీ రైల్వే ట్రాక్, ఎల్కంటి, షెట్పల్లి ఎక్స్రోడ్, నర్సింగపూర్, మద్దులపల్లి, కుందారం, కిష్టాపూర్, వేలాల, గోపాలపూర్ మీదుగా నిర్మిస్తున్నారు.
మంచిర్యాల–-పెద్దపల్లి మధ్య గోదావరి నదిపై భారీ బ్రిడ్జి నిర్మిస్తారు. ఫోర్లేన్ నిర్మాణానికి 4 జిల్లాల పరిధిలో 1,767 ఎకరాల భూములను సేకరించాలని ఆఫీసర్లు నిర్ణయించారు.
జిల్లాలో 25 కి.మీ రహదారి..
జిల్లాలో సుమారు 25 కి.మీ పొడవునా రహదారిని నిర్మించనున్నారు. జైపూర్ మండలంలో ఈ రహదారి ప్రారంభమవుతోంది. రామారావుపేట, ఇందారం, ముదికుంట, నర్వ, టేకుమట్ల, ఎల్కంటి, షెట్పల్లి, నర్సింగాపూర్, బెజ్జాల, కుందారం, రొమ్మిపూర్, కిష్టాపూర్, వేలాల, గోపాలపూర్ తదితర 14 గ్రామాల్లో 866 మంది నుంచి 320 ఎకరాల భూములను రహదారి కోసం సేకరించాల్సి ఉంది. గత యేడాది మార్చిలో షెట్పల్లి కేంద్రంగా భూముల సేకరణకు ఆఫీసర్లు ప్రజాభిప్రాయసేకరణ కూడా చేశారు. 2023 ఫిబ్రవరిలో నిర్వాసిత రైతులకు నోటీసులు జారీ చేశారు.
అయితే ఆఫీసర్లు ఇప్పటి వరకు పరిహారం కోసం అవార్డు ప్రకటించలేదు. మరోవైపు రసూల్పల్లె వద్ద నేషనల్ హైవే 63, గ్రీన్ ఫీల్డ్ హైవేను కలుపుతూ జంక్షన్ ఏర్పాటు చేయనున్నారు. ఈ హైవే అందుబాటులోకి వస్తే మంచిర్యాల, ఆసిఫాబాద్ జిల్లాల వాసులు వరంగల్, కొత్తగూడెం, విజయవాడ లాంటి ప్రాంతాలకు వెళ్లేందుకు కనీసం 60 కి.మీ దూరం తగ్గనుంది. దీని వల్ల టైం కలిసి రావడంతో పాటు సరుకుల రవాణా ఈజీ కానుంది.
ఎకనామిక్ కారిడార్కు అనుకూలం…
రూ.14,666కోట్ల వ్యయంతో కారిడార్పనులను నేషనల్ హైవే అథారిటీ ఆఫ్ ఇండియా చేపట్టనుంది. దీనిని ఐదు ప్యాకేజీలుగా నిర్మిస్తున్నారు. వాటిలో విజయవాడ– ఖమ్మం, ఖమ్మం– వరంగల్, వరంగల్-–మంచిర్యాల ప్యాకేజీలను గ్రీన్ఫీల్డ్ ఎక్స్ప్రెస్ హైవేలుగా నిర్మిస్తారు. మంచిర్యాల –రేపల్లెవాడ, రేపల్లెవాడ-–చంద్రాపూర్ ప్యాకేజీలు బ్రౌన్ఫీల్డ్ ఎక్స్ప్రెస్ హైవేలుగా ఉంటాయి.
మహారాష్ట్రలోని చంద్రాపూర్ నుంచి నాగ్పూర్ వరకు ఇప్పటికే ఉన్న 4 లేన్ల ఎక్స్ప్రెస్ హైవేను ఈ రహదారికి అనుసంధానం చేయనున్నారు. ఈ కారిడార్ పొడవు మొత్తంగా 400 కి.మీగా ఉంది. తెలంగాణ లో 370 కి.మీ, తెలంగాణ సరిహద్దు నుంచి విజయవాడకు 30కి.మీ హైవేను నిర్మించనున్నారు. మంచిర్యాల–-చంద్రాపూర్ నేషనల్ హైవేను నాలుగు వరుసల రహదారిగా మార్చేందుకు కేంద్రం 2018లో రూ.2,407 కోట్లు కేటాయించింది.
ఇప్పటికే ఇందారం క్రాస్ రోడ్డు నుంచి తాండూరు మండలం రేపల్లెవాడ వరకు రూ.1,356.90 కోట్ల వ్యయంతో 42 కి.మీ ఫోర్లేన్ రోడ్డును అందుబాటులోకి తీసుకువచ్చింది. రేపల్లెవాడ నుంచి కుమురంభీం ఆసిఫాబాద్ జిల్లా కౌటాల మండలంలోని మహారాష్ట్ర సరిహద్దు వరకు రెండో ఫేజ్ పనులు నడుస్తున్నాయి.
