హైదరాబాద్, వెలుగు: పోలవరం ప్రాజెక్టుతో ముంపుకు గురయ్యే ప్రాంతాలను గుర్తించాల్సిందిగా ఏపీ సర్కారును పోలవరం ప్రాజెక్టు అథారిటీ (పీపీఏ) ఆదేశించింది. తెలంగాణ అధికారులతో చర్చించి ముంపు ప్రాంతాలను నిర్ధారించాలని సూచించింది. శుక్రవారం ఏపీ ఇరిగేషన్ శాఖ స్పెషల్ సీఎస్కు పీపీఏ లేఖ రాసింది. గతంలో 2021 ఏప్రిల్ 17 నుంచి 29 వరకు ముంపు ప్రాంతాల గుర్తింపుకు జాయింట్ సర్వే చేశారు. ఆ సర్వే ఆధారంగా తెలంగాణ అధికారులతో కలిసి ముంపు ప్రాంతాలను వెంటనే గుర్తించాలని పీపీఏ ఆదేశించింది.
మరోవైపు.. పోలవరం ప్రాజెక్టులోని సాంకేతిక సమస్యలను పరిష్కరించాల్సిందిగా కేంద్ర జలశక్తి శాఖను 2022 సెప్టెంబర్లో సుప్రీం కోర్టు ఆదేశించింది. దీంతో సెంట్రల్ వాటర్ కమిషన్(సీడబ్ల్యూసీ) చైర్మన్ నేతృత్వంలో ప్రభావిత రాష్ట్రాలతో సమావేశాలు నిర్వహించారు. కిన్నెరసాని, ముర్రేడువాగుల ప్రవాహాలకు అడ్డంకులు ఏర్పడుతున్నాయని, దీంతో ఆ వరద సరిగ్గా ప్రవహించకుండా ముంపు పెరుగుతున్నదని తెలంగాణ ఆందోళన వ్యక్తం చేసింది. ఇటు ఎన్జీటీ కూడా ముంపు ప్రాంతాలను గుర్తించాలని గతంలో ఆదేశాలిచ్చింది.
