- సెంట్రింగ్ డబ్బాల దొంగల ముఠా అరెస్ట్
- 43 టన్నుల స్లాబ్బాక్స్ లు స్వాధీనం
- 8 మందికి రిమాండ్, పరారీలో మరో 10 మంది
చేవెళ్ల, వెలుగు: నిర్మాణంలో ఉన్న ఇళ్లే వారి టార్గెట్. ఉదయం రెక్కీ నిర్వహిస్తారు. రాత్రికి పని ఫినిష్ చేస్తారు. ఇలా గడిచిన ఏడు నెలలుగా స్లాబ్ సెంట్రింగ్డబ్బాలను దొంగిలిస్తూ సెంట్రింగ్ యాజమానులకు కంటిమీద కునుకులేకుండా చేస్తున్న గ్యాంగ్లోని 8 మందిని పోలీసులు అరెస్ట్ చేశారు. ఈ కేసు వివరాలను చేవెళ్ల సీఐ భూపాల్ శ్రీధర్ సోమవారం వెల్లడించారు. హైదరాబాద్లోని గుల్షన్ నగర్కు చెందిన మోసిన్ అహ్మద్ (23) స్క్రాప్ బిజినెస్ చేస్తున్నాడు. ఈజీమనీ కోసం యూపీకి చెందిన 17 మందిని రోజువారీ కూలీలుగా నియమించుకున్నాడు.
కొత్తగా నిర్మిస్తున్న బిల్డింగ్ల వద్ద వీరితో ఉదయం రెక్కీ నిర్వహిస్తున్నాడు. ఆపై అర్ధరాత్రి టాటాఏసీ వాహనం తీసుకొని వచ్చి సెంట్రింగ్ డబ్బాలను ఎత్తుకెళ్తున్నారు. రంగారెడ్డి జిల్లాలోని చేవెళ్ల, శంకర్పల్లి, మోకిల, మొయినాబాద్, నార్సింగి పీఎస్ల పరిధిలో దాదాపు 4,566 స్లాబ్ బాక్స్లు దొంగిలించారు. వీరిపై చేవెళ్లలో 6, మొయినాబాద్లో 3, శంకర్ పల్లి, మోకిల, నార్సింగిలో ఒకటి చొప్పున కేసులు నమోదయ్యాయి. ఈ విషయాన్ని చేవెళ్ల పోలీసులు సీరియస్గా తీసుకొని గట్టి నిఘా పెట్టారు.
ఈ నెల 10న చేవెళ్లలో ఓ బిల్డింగ్వద్దకు చోరీకి వచ్చిన ప్రధాన నిధితుడు మోసిన్ అహ్మద్ తో పాటుగా మహ్మద్ రహమాన్, అర్బాజ్, అయాజ్, గుసావ్ అలీ, కలీమ్ ఉద్దీన్, అన్సార్ అలీ, మహమ్మద్ సకిల్ను అదుపులోకి తీసుకున్నారు. నిందితుల నుంచి 43 టన్నుల 3,732 సెంట్రింగ్ డబ్బాలను స్వాధీనం చేసుకున్నారు. వీటి విలువ దాదాపు రూ. 25 లక్షల వరకు ఉంటుందని సీఐ పేర్కొన్నారు. ఈ కేసులో మరో 10 మంది అల్తాప్ హుస్సేన్, ఇమ్రాన్, అఖిల్ బాజ్‌పేయీ, బజేలా అలీ, అజీద్ అలీ, అర్వాజ్, రిజ్వాన్, బాసిమ్ ఖాన్, నన్నే, ఖలీద్ పరారీలో ఉన్నట్లు తెలిపారు. వారిని త్వరలోనే పట్టుకుంటామన్నారు.
