బషీర్ బాగ్, వెలుగు: ఆన్లైన్లో క్రికెట్ బెట్టింగ్లకు అలవాటు పడిన ఓ యువకుడు సెల్ఫోన్లను దొంగలిస్తూ కటకటాల పాలయ్యాడు. కాచిగూడ పీఎస్లో ఏసీపీ రఘు ఈ కేసు వివరాలను శుక్రవారం వెల్లడించారు. నెల్లూరు జిల్లాకు చెందిన రాకేశ్ (23) తుర్కయంజాల్ నీలాద్రినగర్ లో నివాసం ఉంటూ కూలీగా పనిచేస్తున్నాడు. ఆన్లైన్లో క్రికెట్ బెట్టింగ్లు పెట్టి నష్టపోయాడు. మళ్లీ బెట్టింగ్ల కోసం డబ్బులు సంపాదించడానికి మొబైల్ ఫోన్ల దొంగతనాన్ని ఎంచుకున్నాడు.
తన ఇంటి వద్ద ఉన్న మరో మైనర్ బాలుడితో కలిసి బైక్పై తిరుగుతూ సిటీలోని పలుచోట్ల దొంగతనాలకు పాల్పడ్డాడు. ఇటీవల కాచిగూడ పరిధిలో జరిగిన మొబైల్ చోరీపై ఎస్ఐ రవికుమార్ సారథ్యంలో ప్రత్యేక బృందాన్ని ఏర్పాటు చేసి దర్యాప్తు చేపట్టారు. సీసీ కెమెరాల ఆధారంగా రాకేశ్ చేసిన దొంగతనం బయటపడింది. కాచిగూడ పీఎస్ తో పాటు హుస్సేనీ ఆలం, ఐఎస్ సదన్, మీర్ పేట్ పరిధిలోనూ నిందితుడు చోరీలకు పాల్పడ్డాడు.
శుక్రవారం రాకేశ్తో పాటు అతనికి సహకరించిన మైనర్ బాలుడిని పోలీసులు అదుపులోకి తీసుకున్నారు. నాలుగు మొబైల్ ఫోన్లు , బైక్ ను స్వాధీనం చేసుకున్నారు. మైనర్ బాలుడిని బాలసదన్కు, రాకేశ్ను అరెస్ట్ చేసి రిమాండ్కు తరలించినట్లు ఏసీపీ తెలిపారు.
