- బయటకొచ్చి మళ్లీ బైక్ చోరీలు
- ఇద్దరు నిందితుల అరెస్ట్
గచ్చిబౌలి, వెలుగు: వరసకు సోదరులయ్యే వారిద్దరూ వేర్వేరుగా చోరీలు చేసి జైలుకు వెళ్లొచ్చారు. అయినా తీరు మార్చుకోకుండా కలిసి దొంగతనాలు చేస్తూ మరోసారి పోలీసులకు చిక్కారు. ఈ కేసు వివరాలను గచ్చిబౌలి పీఎస్లో మాదాపూర్ఏసీపీ శ్రీకాంత్ వెల్లడించారు. బహదూర్పుర సిఖ్ చౌక్కు చెందిన కరన్వీర్ సింగ్(24) డ్రైవర్గా పనిచేస్తున్నాడు. అతనికి వరసకు సోదరుడయ్యే కరీంనగర్ సిఖ్వాడికి చెందిన జగజ్యోత్ సింగ్(23) సిటీకి వచ్చి ఎస్ఆర్ నగర్లో నివాసం ఉంటూ స్విగ్గీ డెలివరీ బాయ్గా పనిచేస్తున్నాడు. వీరిద్దరూ జల్సాలకు అలవాటుపడి ఈజీమనీ కోసం వేర్వేరుగా పలుచోట్ల దొంగతనాలు చేశారు.
కరన్సింగ్ గతంలో పంజాగుట్ట, హుమాయూన్నగర్, బేగంబజార్, కూకట్పల్లితో పాటు సంగారెడ్డి జిల్లాలో బైక్దొంగతనాలు చేయగా, జగజ్యోత్సింగ్ మియాపూర్, మాదాపూర్, ఆర్సీపురం, చందానగర్, కేపీహెచ్బీ, జీడిమెట్ల పోలీస్ స్టేషన్ల పరిధిలో పలు ఇళ్లలో చోరీలు చేసి, జైలుకెళ్లారు. అక్కడ వీరిద్దరికి మరింత సాన్నిహిత్యం ఏర్పడింది. జైలు నుంచి విడుదలైన తర్వాత పక్కా ప్లాన్ ప్రకారం కలిసి దొంగతనాలు చేయడం మొదలుపెట్టారు.
ఈ నెల 5న గచ్చిబౌలి సుదర్శన్నగర్ కాలనీలో రెండు ఖరీదైన బైక్లను చోరీ చేశారు. ఈ ఘటనపై బాధితుల ఫిర్యాదుతో గచ్చిబౌలి పోలీసులు కేసు నమోదు చేసి దర్యాప్తు చేపట్టారు. సీసీ కెమెరాల ఆధారంగా శుక్రవారం నిందితులిద్దరిని అరెస్ట్ చేశారు. వీరి నుంచి చోరీకి గురైన రూ.3.50 లక్షల విలువైన రెండు బైక్లను స్వాధీనం చేసుకున్నారు.
