మునిపల్లి, వెలుగు : మూడు వెహికల్స్ లో గంజాయి తరలిస్తుండగా సంగారెడ్డి జిల్లా మునిపల్లి మండలం కంకల్ టోల్ ప్లాజా వద్ద పోలీసులు పట్టుకున్నారు. మునిపల్లి పీఎస్ లో అడిషనల్ ఎస్పీ సంజీవరావు మీడియాకు గురువారం వివరాలు తెలిపారు. ఒడిశాలోని గజపతి జిల్లాకు చెందిన వికాస్ కుమార్ మాలి, సునీల్ కుమార్ సాహో, సంతన్ జానీ, అక్షయ్ కుమార్ గమంగో, రాజకుమార్ బర్దన్, మహారాష్ట్రకు చెందిన దూకల్లె వసంత్ బాబురావు, హనుమంత్ రామదాసు పవార్ ముఠా ఏర్పడ్డారు. వికాస్ కుమార్ మాలీ వద్ద ఎండు గంజాయి కొనుగోలు చేసి కార్లలో ప్రత్యేక క్యాబిన్లు ఏర్పాటు చేసి మహారాష్ట్రకు తీసుకెళ్లి వివిధ ప్రాంతాల్లో అమ్ముతున్నారు.
గురువారం ముంబై నుంచి హైదరాబాద్ కు మూడు వాహనాల్లో గంజాయి తరలిస్తున్నట్టు సమాచారం అందడంతో మునిపల్లి ఎస్ ఐ రాజేశ్ నాయక్ ఆధ్వర్యంలో వాహనాల తనిఖీ చేపట్టారు. కారులో 32 కిలోల ఎండు గంజాయి దొరికింది. నిందితులను అదుపులోకి తీసుకుని, మూడు కార్లు, రూ. 50 వేల నగదు, 10 సెల్ ఫోన్లను స్వాధీనం చేసుకున్నారు. గంజాయి విలువ 6. 50 లక్షలు ఉంటుంది. సంగారెడ్డి డీఎస్పీ సత్తయ్య గౌడ్ , సీఐలు, ఎస్ఐలు, సీపీఎస్ పోలీసులు ఉన్నారు.
