- 3.1 కిలోల వెండి, మూడు గ్రాముల బంగారం స్వాధీనం
- సహకరించిన భార్య, వెండి వ్యాపారిపై కేసు నమోదు
భైంసా, వెలుగు: భైంసాలోని పలు ఆలయాల్లో వరుస చోరీలకు పాల్పడుతున్న దొంగను పోలీసులు పట్టుకున్నారు. అతడి వద్ద నుంచి వెండి, బంగారు అభరణాలు స్వాధీనం చేసుకున్నారు. మంగళవారం భైంసాలోని తన క్యాంపు ఆఫీస్లో ఎస్పీ డా.జానకీ షర్మిల, భైంసా ఏఎస్పీ అవినాశ్ కుమార్తో కలిసి వివరాలు వెల్లడించారు. సోమవారం అర్ధరాత్రి ఒంటిగంట ప్రాంతంలో భైంసాలోని శివాజీ చౌక్లో అనుమానాస్పదంగా తిరుగుతున్న ఓ వ్యక్తిని పోలీసులు అదుపులోకి తీసుకున్నారు.
అతని వద్ద చోరీకి ఉపయోగించే సామగ్రి లభించడంతో పీఎస్కు తరలించి తమదైన శైలిలో విచారించారు. దీంతో తాను చోరీలకు పాల్పడుతున్నట్లు ఒప్పుకున్నాడు. ఆదిలాబాద్జిల్లా ఊట్నూరుకు చెందిన విజయ్ షిండే(36) కొంత కాలంగా మహారాష్ట్రలోని నాందేడ్ జిల్లా బలరాంపూర్లో ఉంటూ అక్కడ దొంగతనాలు చేస్తున్నాడు. రెండున్నర నెలల నుంచి భైంసా పట్టణలోని నర్సింహస్వామి ఆలయం, పూలే నగర్ హనుమాన్ మందిర్, సంతోషిమాత మందిర్, కైలాస్ ఫ్యాక్టరీ పరిధిలోని శ్రీ బాలాజీ దేవాలయంతో పాటు హిమా వైన్స్లో వరుసగా చోరీలకు పాల్పడ్డాడు.
ఇందుకు సాంకేతిక పరిజ్ఞానం ఉపయోగిస్తూ.. ఆనవాళ్లు లేకుండా చాకచక్యంగా తప్పించుకుంటున్నాడు. చోరీ చేసిన వెండి, బంగారు అభరణాలను విక్రయించేందుకు గాను ఆయన భార్య పూజా షిండే, మహారాష్ట్రకు చెందిన వెండి వ్యాపారి పాండురంగ్రామారావు సహకరించినట్లు వెల్లడించారు. వారి వద్ద నుంచి 3 కిలోల 150 గ్రాముల వెండి, మూడు గ్రాముల బంగారాన్ని పోలీసులు స్వాధీనం చేసుకున్నారు. నిందితుడిని రిమాండ్కు తరలిస్తున్నామని, అతడి భార్యతోపాటు వ్యాపారిని త్వరలోనే అరెస్టు చేస్తామని ఎస్పీ వెల్లడించారు.
