- 27 గ్రాముల ఎండీఎంఏ డ్రగ్స్ సీజ్, ఇద్దరి అరెస్ట్
హైదరాబాద్సిటీ, వెలుగు: మొజంజాహి మార్కెట్ సమీపంలోని జాంబాగ్ ఫ్లవర్ మార్కెట్ ప్రాంతంలో డ్రగ్స్ పట్టుబడింది. ఈ ఘటనలో ఇద్దరిని ఎక్సైజ్ ఎస్టీఎఫ్ పోలీసులు అరెస్ట్ చేశారు. వీరి నుంచి రూ. 1.62 లక్షల విలువైన 27 గ్రాముల ఎండీఎంఏ డ్రగ్స్ ను స్వాధీనం చేసుకున్నారు. రాజస్థాన్ లోని జాలర్ ప్రాంతానికి చెందిన సుశీల్కుమార్ కుటుంబం హైదరాబాద్ కు వచ్చి చిరు వ్యాపారం చేస్తోంది.
ఆశించిన లాభాలు రాకపోవడంతో డ్రగ్స్ వ్యాపారం మొదలు పెట్టాడు. రాజస్థాన్కు చెందిన ప్రవీణ్ సింగ్ రావ్ బెంగళూరు కేంద్రంగా డ్రగ్స్ వ్యాపారం చేస్తున్నాడు. ప్రవీణ్ సలహాతో సుశీల్ కుమార్ బెంగళూరులో ఒక గ్రాము డ్రగ్స్ను రూ.3 వేలకు కొనుగోలు చేసి, హైదరాబాద్లో రూ.6 వేలకు అమ్మడం ప్రారంభించాడు.
హైదరాబాద్ కు చెందిన రమేశ్, చరణ్ వద్ద డ్రగ్స్కొన్నాడు. కాచిగూడ రైల్వే స్టేషన్ క్వార్టర్స్ చెందిన పలుకూరి దీపక్కు ఆదివారం డ్రగ్స్ అమ్ముతుండగా, ఇద్దరిని ఎక్సైజ్ పోలీసుల అరెస్ట్ చేశారు. హితేశ్, షేక్ మహమ్మద్, బాబిలకు కూడా డ్రగ్స్ అమ్మినట్టు సుశీల్తేలడంతో వారిపైనా కేసులు నమోదు చేశారు.
2 కేజీల గంజాయి పట్టివేత
హయత్ నగర్ తొర్రూర్ ఎక్స్ రోడ్లో రెండు కేజీల గంజాయి పట్టుబడింది. మేడ్చల్ మల్కాజిగిరి జిల్లా బొల్లారం ప్రాంతానికి చెందిన పసుపులేటి లోకేశ్ రెండు కిలోల గంజాయిని ఇతరులకు అమ్మడానికి ప్రయత్నిస్తుండగా, ఎక్సైజ్ ఎస్ టీఎఫ్ పోలీసులు పక్కా సమాచారంతో పట్టుకున్నారు. నిందితుడి నుంచి రెండు కేజీల గంజాయిని స్వాధీనం చేసుకున్నారు.
