- గ్రేటర్ వరంగల్లో పెరుగుతున్న వాహనాల రద్దీ
- ఈ ట్రాఫిక్ చిక్కులు తలెత్తుతుండటంతో పోలీసుల యాక్షన్
- నగరంలో ఏడు చోట్ల పార్కింగ్ ప్లేసులు
- కొత్తగా 10 జంక్షన్లలో సిగ్నలింగ్ వ్యవస్థ
- సెల్లార్లు, ఫుట్ పాత్ ఆక్రమణలు తొలగించేందుకు కసరత్తు
హనుమకొండ, వెలుగు : వరంగల్ ట్రై సిటీలో రోజురోజుకు వాహనాల రద్దీ పెరిగిపోతోంది. పండుగల టైంలో ట్రాఫిక్ మరీ ఎక్కువవుతోంది. కానీ సిటీలో రద్దీకి అనుగుణంగా పార్కింగ్ ప్లేసులు, రష్ ఎక్కువగా ఉండే జంక్షన్లలో సిగ్నలింగ్ వ్యవస్థ లేకపోవడంతో ఇబ్బందులు ఎదురవుతున్నాయి. ఈ ట్రాఫిక్ కష్టాలకు ఫుల్ స్టాప్ పెట్టేందుకు పోలీసులు రెడీ అవుతున్నారు. జంక్షన్లలో సిగ్నలింగ్ వ్యవస్థ ఏర్పాటు చేయడంతో పాటు పార్కింగ్ ప్లేసులు అందుబాటులోకి తెచ్చేందుకు కసరత్తు చేస్తున్నారు.
సెల్లార్లు, ఫుట్ పాత్ ఆక్రమణలపై నజర్
వరంగల్ నగర రోడ్లపై నిత్యం లక్షకు పైగా వాహనాలు రాకపోకలున్నట్టు అధికారుల అంచనా వేస్తున్నారు. వివిధ అవసరాల కోసం లక్షలాది మంది నగరానికి వస్తుండగా.. సిటీలో బండ్లు పార్క్ చేసేందుకు అనువైన ప్రదేశాలు మాత్రం లేవు. ఓ వైపు పార్కింగ్ ప్లేసులు లేక, మరోవైపు కమర్షియల్ కాంప్లెక్స్లలో సెల్లార్లను వినియోగించుకోలేని పరిస్థితి ఉండటంతో వరంగల్, హనుమకొండలోని బిజినెస్ అడ్డాలు, ఆసుపత్రుల వద్ద బండ్లన్నీ రోడ్లపైనే ఉంటున్నాయి.
వరంగల్ ట్రై సిటీలో వాహనాల రాకపోకలు ఎక్కువగా ఉండే ఏడు ప్రాంతాల్లో పార్కింగ్ ప్లేసులు వినియోగంలోకి తీసుకొచ్చేందుకు చర్యలు చేపడుతున్నారు.
సిటీలో ఫుట్పాత్ ఆక్రమణలు
సిటీలో ఫుట్ పాత్లు దాదాపు 90 శాతం ఆక్రమణల చెరలోనే ఉండగా, రోడ్ల వెంట హోటల్స్, ఆసుపత్రులు, షాపింగ్ మాల్స్, వివిధ కాంప్లెక్సుల నిర్వాహకులు ఫుట్ పాత్ లను కూడా వాడుతున్నారు. దీంతో పాదచారులు కూడా వాటిని వినియోగించుకోలేని పరిస్థితి నెలకొంది. ఫలితంగా జనాలు కూడా మెయిన్ రోడ్లపైనే నడుస్తుండటంతో ట్రాఫిక్ చిక్కులు కూడా ఎదురవుతున్నాయి. ఈ ఫుట్ పాత్ ఆక్రమణలు తొలగించేందుకు పోలీసులు కసరత్తు చేస్తున్నారు. అలాగే సెల్లార్లను పార్కింగ్ కోసం కాకుండా ఇతర అవసరాలకు వినియోగించేవారిపై దృష్టి పెడుతున్నారు.
కొత్త జంక్షన్లలో సిగ్నల్స్
గ్రేటర్ సిటీలో వెహికిల్స్ ను కంట్రోల్ చేయడానికి జంక్షన్ల అభివృద్ధి, సిగ్నలింగ్ వ్యవస్థ ఏర్పాటు చేసేందుకు ఆఫీసర్లు ప్రపోజల్స్ సిద్ధం చేశారు. పది జంక్షన్లలో పని చేయని పాత సిగ్నల్స్ మార్చడంతో పాటు రద్దీ ఎక్కువగా ఉంటున్న మరో 10 జంక్షన్లలో కొత్తగా సిగ్నల్స్ ఏర్పాటు చేయనున్నారు. రెండు రోజుల కిందట రోడ్డు సేఫ్టీ మీటింగ్ నిర్వహించిన వరంగల్ సీపీ అంబర్ కిశోర్ ఝా, గ్రేటర్ కమిషనర్ అశ్వినీ తానాజీ వాకడే, హనుమకొండ కలెక్టర్ పి.ప్రావీణ్య, ట్రాఫిక్ ఏసీపీ సత్యనారాయణ నగరంలో పార్కింగ్ ప్లేసులు, కొత్తగా సిగ్నల్స్ ఏర్పాటు చేయనున్న ప్రాంతాలను విజిట్ చేశారు.
పార్కింగ్ ప్లేసులు ఏర్పాటు చేయబోయే ప్రాంతాలు
- వరంగల్ రైల్వే స్టేషన్, వరంగల్ హెడ్ పోస్టాఫీస్, వరంగల్ చౌరస్తా, హనుమకొండ చౌరస్తా, అశోక జంక్షన్, అదాలత్ జంక్షన్, కాజీపేట చౌరస్తా
కొత్తగా సిగ్నల్స్ వ్యవస్థ ఏర్పాటు చేయనున్న జంక్షన్లు
- మడికొండ, వడ్డేపల్లి చర్చి, పెగడపల్లి డబ్బాలు, పెద్దమ్మగడ్డ జంక్షన్, న్యూ శాయంపేట, తెలంగాణ జంక్షన్, వరంగల్ ఆర్టీఏ ఆఫీస్, మర్కజీ స్కూల్ జంక్షన్, కేఎల్ఎన్ రెడ్డి కాలనీ జంక్షన్, కిట్స్ కాలేజీ క్రాస్ రోడ్డు.
ట్రాఫిక్ కంట్రోల్తో పాటు ప్రమాదాల నివారణ
వరంగల్ నగరంలో ట్రాఫిక్ కంట్రోల్ తో పాటు ప్రమాదాల నివారణకు చర్యలు చేపడుతున్నాం. రెండు, మూడు రోజుల్లో ఫుట్ పాత్ ఆక్రమణలు, సెల్లార్ల వినియోగంపై జీడబ్ల్యూఎంసీ ఆఫీసర్ల సమన్వయంతో చర్యలు తీసుకుంటాం. కొత్త జంక్షన్లలో సిగ్నల్స్ వ్యవస్థ ఏర్పాటు చేయడంతో పాటు పార్కింగ్ ప్లేసులు అందుబాటులోకి తీసుకొచ్చి వాహనాల రాకపోకల విషయంలో సమస్యలు తలెత్తకుండా చర్యలు చేపడతాం.
- సత్యనారాయణ, వరంగల్ ట్రాఫిక్ ఏసీపీ
