- పోలీస్ తరహాలో ప్రైవేట్ సెక్యూరిటీ గార్డుల నియామకం
హైదరాబాద్, వెలుగు: హైదరాబాద్ సిటీలో ప్రజల రక్షణ కోసం పోలీసులు వినూత్న ప్రయోగం చేస్తున్నారు. పోలీస్తరహాలో ప్రైవేట్ సెక్యూరిటీ గార్డు వ్యవస్థను ఏర్పాటు చేసేందుకు ఏర్పాట్లు చేస్తున్నారు. డ్రగ్స్‌, మహిళల భద్రత, సైబర్ సెక్యూరిటీ, ట్రాఫిక్‌ మానిటరింగ్‌, ఇన్‌‌ఫ్రాస్ట్రక్చర్‌, కమర్షియల్ కాంప్లెక్స్‌‌ల వద్ద భద్రత కోసం ఆ గార్డులను వినియోగించనున్నారు. ఇందులో భాగంగా హైదరాబాద్ సిటీ సెక్యూరిటీ కౌన్సిల్ (హెచ్‌‌సీఎస్‌‌సీ) ఆధ్వర్యంలో శుక్రవారం ‘నేషనల్‌ ఫిజికల్ సెక్యూరిటీ సమ్మిట్‌ 2024’ పేరుతో సదస్సు నిర్వహించనున్నారు.
బంజారా హిల్స్‌‌లోని కమాండ్ అండ్ కంట్రోల్ సెంటర్‌‌‌‌లో జరిగే ఈ కార్యక్రమానికి డిప్యూటీ సీఎం మల్లు భట్టి విక్రమార్క, ఐటీ మంత్రి శ్రీధర్‌ బాబు సహా ప్రైవేట్ సెక్యూరిటీ ఏజెన్సీల నిర్వాహకులు హాజరుకానున్నారు. ఇందుకు సంబంధించిన లోగోను సిటీ సీపీ, హెచ్‌‌సీఎస్‌‌సీ చైర్మన్‌ కొత్తకోట శ్రీనివాసరెడ్డి బుధవారం ఆవిష్కరించారు. ఈ సందర్భంగా సీపీ శ్రీనివాసరెడ్డి మాట్లాడుతూ.. గ్లోబల్ సిటీగా మారుతున్న హైదరాబాద్‌‌లో భద్రతకు అధిక ప్రాధాన్యం ఇస్తున్నామన్నారు. రోజురోజుకు పెరిగిపోతున్న సెక్యూరిటీ అవసరాలకు అనుగుణంగా చర్యలు చేపడుతున్నామని చెప్పారు.
