కాగజ్ నగర్, వెలుగు: మహారాష్ట్రకు అక్రమంగా తరలిస్తున్న 208 క్వింటాళ్ల రేషన్ బియ్యాన్ని పోలీసులు పట్టుకున్నారు. సిర్పూర్ టీ పోలీస్ స్టేషన్లో ఏర్పాటు చేసిన ప్రెస్ మీట్లో కౌటాల్ సీఐ ముత్యం రమేశ్, ఎస్ఐ కమలాకర్తో కలిసి ఎస్పీ డీవీ శ్రీనివాసరావు వివరాలు వెల్లడించారు. బియ్యం అక్రమ రవాణాపై పక్కా సమాచారంతో మంగళవారం ఉదయం చెక్పోస్ట్ వద్ద తనిఖీలు చేపట్టి మూడు వాహనాల్లో తరలిస్తున్న 208 క్వింటాళ్ల రేషన్ బియ్యాన్ని పట్టుకున్నారు.
డ్రైవర్లు కాగజ్ నగర్కు చెందిన ఇషాక్ అహ్మద్, మహ్మద్ కలీంను అదుపులోకి తీసుకుని విచారించారు. ఆ బియ్యం మహ్మద్ రజిక్ రహెమాన్, సయ్యద్ ఆరిఫ్విగా గుర్తించారు. భీమిని మండలం జనకాపూర్ గ్రామానికి చెందిన రాకేశ్, అశోక్ వద్ద కొనుగోలు చేసి.. మహారాష్ట్రలోని వీరూర్కి చెందిన ఉప్పరె సంతోష్కు అమ్మేందుకు తీసుకెళ్తున్నట్లు గుర్తించారు. పట్టుబడ్డ బియ్యం విలువ రూ.7.48 లక్షలు ఉంటుందని ఎస్పీ తెలిపారు. కొన్ని బియ్యం బస్తాలు డైరెక్ట్గా రేషన్ డీలర్ షాపులో నుంచి వచ్చినట్టుగా తేలిందని.. దీనిపై రెవెన్యూ అధికారులతో దర్యాఫ్తు చేస్తున్నామని చెప్పారు. బియ్యాన్ని తరలిస్తున్న నలుగురిని అదుపులోకి తీసుకున్నామని, మిగతా వారి కోసం గాలిస్తున్నట్లు చెప్పారు.
