బోధన్​లో వేడెక్కుతున్న రాజకీయం

•     బీఆర్ఎస్, కాంగ్రెస్, బీజేపీ లీడర్ల పరస్పర విమర్శలు
•     రోజుకు రెండు సార్లు ప్రెస్​మీట్లతో ఒకరిపై ఒకరు ఆరోపణలు
•     ఎవరి మాటలు నమ్మాలో తెలియక గందరగోళంలో క్యాడర్, ప్రజలు

బోధన్, వెలుగు : అసెంబ్లీ ఎన్నికల నోటిఫికేషన్​ వెలువడక ముందే బోధన్​లో రాజకీయ వాతావరణం వేడెక్కింది. రేపో, మాపో ఎలక్షన్ అన్న ​వాతావరణం కనిపిస్తోంది. బీఆర్ఎస్, కాంగ్రెస్, బీజేపీ లకు చెందిన జిల్లా స్థాయి లీడర్ల నుంచి గ్రామస్థాయి లీడర్ల వరకు ప్రెస్​మీట్లతో హోరెత్తిస్తున్నారు. ఒకరిపై మరొకరు ప్రతివిమర్శలు చేసుకుంటూ వ్యక్తిగత దూషణలకు దిగుతున్నారు. దీంతో ఎవరి మాటలు నమ్మాలో? ఎవరి మాటలు నమ్మకూడదో తెలియక అటు క్యాడర్, ఇటు నియోజకవర్గ ప్రజలు ఆందోళన చెందుతున్నారు.

మొదలైందిలా..

ఈనెల 16న బోధన్​లోని శక్కర్​నగర్​లో బీఆర్ఎస్ లీడర్లు బూత్​కమిటీ సమావేశం నిర్వహించారు. ఎమ్మెల్సీ కవిత, బోధన్ ఎమ్మెల్యే షకీల్​ఆధ్వర్యంలో జరిగిన ఈ మీటింగ్​లో మాజీ మంత్రి పి.సుదర్శన్​రెడ్డి, బీజేపీ  నాయకులపై విమర్శలు చేశారు. కాంగ్రెస్​ హయాంలో ఇరిగేషన్​ మంత్రిగా పనిచేసిన సుదర్శన్​రెడ్డి బోధన్ ను ఏమాత్రం డెవలప్​చేయలేదని, కరోనా టైమ్​లో నియోజకవర్గ ప్రజలు చావుబతుకుల మధ్య కొట్టుమిట్టాడుతుంటే కనీసం కన్నెత్తి చూడలేదంటూ విమర్శించారు. సుదర్శన్​రెడ్డి హయాంలోనే ఎన్ డీఎస్​ఎల్​ ఫ్యాక్టరీ ప్రైవేట్​పరం అయిందని, ఇప్పుడు కార్మికులు దీక్షలు చేస్తుంటే, వాళ్ల దగ్గరికెళ్లి పరామర్శించడం ఏమిటని కామెంట్ ​చేశారు. బీజేపీ లీడర్లు మేడపాటి ప్రకాశ్​ రెడ్డి, వడ్డీ మోహన్​ రెడ్డి గోడమీద పిల్లిలాంటివారని, ఇప్పటికే టీడీపీ, కాంగ్రెస్ పార్టీలు మారి బీజేపీలో చేరరన్నారు. బీజేపీలోనూ టిక్కెట్​దక్కకుంటే ఎంఐఎం నుంచైనా పోటీ చేయడానికి సిద్ధంగా ఉన్నారంటూ ఎద్దేవా చేశారు.

కాంగ్రెస్ నేతల విమర్శలు.. 

ఎమ్మెల్యే షకీల్​ సుదర్శన్​రెడ్డిపై ఆరోపణలకు సమాధానమిచ్చేందుకు కాంగ్రెస్​ టౌన్​ ప్రెసిడెంట్​ పాషామొయినోద్దీన్, టౌన్​వర్కింగ్ ​ప్రెసిడెంట్​హరికాంత్ చారి 18 న ప్రెస్​మీట్​ నిర్వహించారు. బోధన్ లో సుదర్శన్​రెడ్డి ఆధ్వర్యంలోనే అభివృద్ధి జరిగిందని, అలీసాగర్, సాలూర ఎత్తిపోతల పథకాలు చేపట్టగా, ఆ నీళ్లతోనే నేడు రైతులు రెండు పంటలు పండిస్తున్నారన్నారు. సుదర్శన్​ రెడ్డి వైట్​కాలర్​ మంత్రిగా పేరు తెచ్చుకున్నారని, ఆయన జోలికొస్తే ఊరుకునేది లేదంటూ హెచ్చరించారు.

చోటామోటా లీడర్లు సైతం..

ఈ నెల19న కాంగ్రెస్​యూత్ లీడర్లు దోడ్ల రవీందర్​రెడ్డి, మందర్నా రవి, నాయకులతో కలసి ప్రెస్​మీట్​నిర్వహించారు. ఎమ్మెల్యే షకీల్​చేసిన అభివృద్ధి ఏం లేదంటూ విమర్శలు చేశారు. ప్రతిగా ఇదే రోజు సాయంత్రం సాలూర మండలం హున్సాలో బీఆర్ఎస్​నాయకులు జక్క నాగరాజు ప్రెస్​మీట్​పెట్టి మాజీ సుదర్శన్​రెడ్డిని విమర్శించారు. 20న ఎమ్మెల్యే ఆఫీస్​లో బీఆర్ఎస్​టౌన్​ప్రెసిడెంట్​రవీందర్​యాదవ్, మార్కెట్​కమిటీ చైర్మన్ వీఆర్​దేశాయ్, సాలూర లో  రైతుబంధు మాజీ మండల కోఆర్డీనేటర్ బుద్దె రాజేశ్వర్, మార్కెట్​కమిటీ వైస్​చైర్మన్​షకీల్, సర్పంచులు, ఎంపీటీసీలు ప్రెస్​మీట్​పెట్టి కాంగ్రెస్, బీజేపీ​లీడర్లను విమర్శించారు. పూటకో లీడర్​ప్రెస్​మీట్​పెట్టి, ఆరోపణలు చేస్తుండడంతో ప్రజల్లో కన్​ఫ్యూజన్​ క్రియేట్​ అవుతుంది.

బీజేపీ కౌంటర్..​

ఎమ్మెల్సీ కవిత, ఎమ్మెల్యే షకీల్​ విమర్శలకు సమాధానంగా ఈ నెల 17న బీజేపీ రాష్ట్ర కార్యవర్గ సభ్యుడు వడ్డీ మోహన్​రెడ్డి ఎంపీఆర్ ఆఫీస్​లో ప్రెస్​మీట్ నిర్వహించారు. బీజేపీ నాయకులపై వ్యక్తిగత విమర్శలు చేస్తే ఊరుకునేది లేదంటూ హెచ్చరించారు. అక్రమంగా వచ్చిన సంపాదనతో మరోసారి ఎమ్మెల్యేగా గెలిచేందుకు చూస్తున్నారని, త్వరలోనే ఎమ్మెల్యే అవినీతిని ఆధారాలతో సహా నిరూపిస్తామంటూ కౌంటర్​ ఇచ్చారు.