- ఎమ్మెల్యే భగత్ కు వ్యతిరేకంగా ఏకతాటిపైకి అసమ్మతి నేతలు
- నామినేషన్లు ముగిసే వరకు వదిలే ప్రసక్తే లేదని స్పష్టీకరణ
- ఇంకోవైపు బీజేపీ హైకమాండ్తో మంతనాలు
నల్గొండ, వెలుగు : నాగార్జునసాగర్ బీఆర్ఎస్లో పొలిటికల్హీట్పెరుగుతోంది. సిట్టింగ్ఎమ్మెల్యే నోముల భగత్కు వ్యతిరేకంగా టికెట్ కోసం ప్రయత్నించిన లీడర్లు ఇంకా ఆశగానే ఎదురుచూస్తున్నారు. పార్టీ బీఫామ్ చేతికి అందే వరకూ ఎలాంటి మార్పులైనా జరగొచ్చని టికెట్ కోసం ప్రయత్నిస్తూనే ఉన్నారు. విద్యావేత్త అల్లు అర్జున్ మామ కంచర్ల చంద్రశేఖర్రెడ్డి ఓవైపు, మన్నెం రంజిత్ యాద వ్ మరోవైపు నియోజకవర్గంలోని అసంతృప్తులతో చర్చలు కొనసాగిస్తూనే ఉన్నారు. ఉమ్మడి జిల్లాలోని ఆయా నియోజకవర్గాల్లో అసంతృప్తులను హైకమాండ్ బుజ్జిగిస్తుంటే సాగర్లో మాత్రం అలాంటి పరిస్థితులు కనిపించడం లేదు. మంత్రి జగదీశ్రెడ్డి ప్రధాన అనుచరుడు ఎమ్మెల్సీ ఎంసీ కోటిరెడ్డికి ఎమ్మెల్యే భగత్తో ఉన్న విభేదాలు ఇంకా పూర్తిస్థాయిలో సమసిపోలేదు. కోటిరెడ్డి సొంత మండలం తిరుమలగిరి చెందిన పలువురు ముఖ్యనేతలు కాంగ్రెస్లో చేరినా ఆపే ప్రయత్నాలు చేయట్లేదు. ఇక నిడమనూరు మండలంలో ఒకప్పటి జానారె డ్డి సన్నిహితుడు చేకూరి హనుమంతరావు కొడుకు వంశీ కాంగ్రెస్లో చేరడం మరింత ఆందోళనకు గురిచేస్తోంది.
స్పెషల్ క్యాంపులు
భగత్ను ఎమ్మెల్యే అభ్యర్థిగా హైకమాండ్ ప్రకటించినప్పటికీ ఆశావహులు మాత్రం ప్రత్యేక క్యాంపులు పెడుతున్నారు. బుధవారం కంచర్ల చంద్రశేఖర్ రెడ్డి ఎమ్మెల్యే వ్యతిరేక వర్గంతో గుర్రంపోడులో చర్చలు జరిపారు. గుర్రంపోడు జడ్పీటీసీ భర్త గాలి రవితో భేటీ అయ్యారు. పార్టీ వర్కింగ్ ప్రెసిడెంట్ కేటీఆర్ నుంచి చంద్రశేఖర్ రెడ్డికి పిలుపు వచ్చిందని తెలిసినప్పటికీ ఆయన నియోజకవర్గంలో అసమ్మతి నేతలతో సంప్రదింపులు జరుపుతున్నారు. ఇంకోవైపు మన్నెం రంజిత్ యాదవ్ నియోజకవర్గంలో జరిగే ఫంక్షన్లలో పాల్గొంటున్నారు. దసరా పండుగ నేపథ్యంలో విగ్రహాలకు విరాళలు ఇవ్వడంతో పాటు, యువ ఓటర్లు, స్థానిక ప్రజాప్రతినిధులతో చర్చలు జరుపుతున్నారు.
ALSO READ: మానకొండూర్లో బీఆర్ఎస్‌‌‌‌కు షాక్
అసమ్మతి నేతలపై బీజేపీ ఫోకస్
బీఆర్ఎస్ అభ్యర్థి విషయంలో హైకమాండ్ మనసు మారని పక్షంలో ఆశా వహులు తలోదారి చూసుకోవాలనే ఆలోచనలో ఉన్నారు. ఇప్పటికే పలువురు ముఖ్యనేతలు బీజేపీ హైకమాండ్తో టచ్లో ఉన్నట్టు తెలిసింది. ఇప్పటికే సాగర్ బీజేపీ టికెట్ కోసం జిల్లా అధ్యక్షుడు శ్రీధర్రెడ్డి భార్య కంకణాల నివేధిత రెడ్డి, రిక్కల ఇంద్రసేనా రెడ్డి మధ్య పోటీ ఉంది. ఈ క్రమంలో బీఆర్ఎస్ అసమ్మతి నేతలు కంచర్ల చంద్రశేఖ ర్రెడ్డి, మన్నెం రంజిత్ యాదవ్పైన బీజేపీ హైకమాండ్ దృష్టి సారించినట్టు తెలిసింది. బీజేపీ అభ్యర్థులను ఈ నెల 15 తర్వాత ప్రకటించే అవకాశం ఉంది. కుదిరితే ఈ రెండు, మూడు రోజుల్లో.. లేదంటే నామినేషన్ల టైం వరకు బీఆర్ఎస్ అసమ్మతి నేతలు బీజేపీలోకి వెళ్లేందుకు కూడా వెనకాడేది లేదని తమ అనుచరులతో స్పష్టం చేసినట్టు సమాచారం.
