- భారీగా వలసలు ఉంటాయని చెబుతున్న ఎంపీ వర్గం
- తప్పుడు ప్రచారం చేస్తున్నారంటున్న ఎమ్మెల్యే వర్గం
- పట్టణంలో కోమటిరెడ్డి ప్రచారాన్ని అడ్డుకున్న ఎమ్మెల్యే అనుచరులు
- సోషల్ మీడియాలో వైరల్ అవుతున్న వీడియోలు
నల్గొండ, వెలుగు: నల్గొండ నియోజకవర్గంలో రాజకీయం వేడెక్కింది. ఎనిమిది మంది మున్సిపల్‌ కౌన్సిలర్లు బీఆర్ఎస్‌‌‌‌కు రాజీనామా చేసి, ఎంపీ కోమటిరెడ్డి సమక్షంలో కాంగ్రెస్లో చేరిన విషయం తెలిసిందే. అంతేకాదు కాంగ్రెస్లోకి భారీగా వలసలు ఉంటాయని, మిగిలేది ఎమ్మెల్యే భూపాల్రెడ్డి ఒక్కరేనని కోమటిరెడ్డి శిబిరం ప్రచారం చేస్తోంది. సర్పంచ్లు, ఎంపీటీసీలు, పార్టీ నాయకులు కాంగ్రెస్లోకి వస్తారని ఆ వర్గం చెబుతుండగా.. ఎమ్మెల్యే వర్గం తప్పుడు ప్రచారమని కొట్టి పారేస్తోంది. పార్టీ మార్పుపై జరుగుతున్న ప్రచారంలో వాస్తవం లేదని, ఉద్దేశపూర్వకంగా తమపై అవాస్తవాలు వైరల్ చేస్తున్నారని నల్గొండ మండల సర్పంచ్లు, ఎంపీటీసీలు శుక్రవారం ప్రెస్‌‌‌‌మీట్‌ పెట్టి ఖండించారు.
ఎంపీ వెంకటరెడ్డిని అడ్డుకున్న ఎమ్మెల్యే వర్గం
ఎమ్మెల్యే కంచర్ల భూపాల్ రెడ్డి, ఎంపీ కోమటిరెడ్డి వెంకటరెడ్డి పోటాపోటీగా ఎన్నికల ప్రచారం నిర్వహిస్తున్నారు. ఒక దఫా రూరల్ మండలాల్లో పర్యటించిన నేతలు ఇప్పుడు నల్గొండ పట్టణంపై ఫోకస్ పెట్టారు. ఎమ్మెల్యే ఇప్పటికే పలు వార్డుల్లో ప్రచారం ముగించారు. ఎంపీ కోమటిరెడ్డి మాత్రం సెంటిమెంట్ ప్రకారం శనివారం వీటీకాలనీలోని వెంకటేశ్వర టెంపుల్‌‌లో పూజలు చేసి ప్రచారం షురూ చేశారు. కాలినడకన, బైక్‌‌‌‌పై వార్డుల్లో ఇంటింటికి తిరిగి ఓటర్లను కలుస్తున్నారు. ఈ క్రమం లో 25 వార్డులోని దుర్గామాత ఆలయానికి వస్తుండగా కాలనీ యువకులు వెంకటరెడ్డిని అడ్డుకున్నారు. ‘భూపాల్రెడ్డి పెట్టిం చిన విగ్రహం..ఇక్కడికి రావొద్దు’ అని కొందరు యువకులు అడ్డుచెప్పడంతో వెంకటరెడ్డి టెంపుల్బయటి నుంచే దండం పెట్టి వెనక్కి వెళ్లిపోయారు. వెంకటరెడ్డి సమక్షంలోనే భూపాల్ రెడ్డికి అనుకూలంగా నినాదాలు చేయడంతో అక్కడి పరిస్థితులు కొంత ఉద్రిక్తతకు దారి తీశాయి.
సోషల్ మీడియాలో వీడియోలు హల్‌‌‌‌చల్
ఎమ్మెల్యే, ఎంపీలు చేస్తున్న ప్రచారంపై వారి అనుచరులు ఎప్పటికప్పుడు సోషల్ మీడియాలో పోస్టులు పెడుతున్నారు. ఎంపీ వెంకటరెడ్డిని అడ్డుకున్న యువకులు వీడియోలకు రీమీక్స్ సాంగ్స్ క్రియేట్ చేసి వాట్సాప్ గ్రూపుల్లో పోస్టులు పెట్టి వైరల్ చేస్తున్నారు. నాలుగే ళ్ల నుంచి పత్తాలేని కోమటిరెడ్డి నల్గొండకు ఎందుకు వచ్చావ్? అని కామెంట్స్పెడుతున్నారు. కౌన్సిలర్ల పార్టీ మార్పుపై ఎంపీ తనదైన శైలిలో కౌంటర్ ఇస్తున్నారు. పార్టీ మారొచ్చిన లీడర్లపై కామెంట్స్చేస్తే సహించేది లేదని, ఎమ్మెల్యే వైఖరి నచ్చకనే పార్టీలోకి వచ్చారని స్పష్టం చేస్తున్నారు.
మున్సిపాలిటీలో పెరిగిన కాంగ్రెస్ బలం
కౌన్సిలర్ల చేరికతో మున్సిపాలిటీలో కాంగ్రెస్ బలం పెరిగింది. మొత్తం 48 మంది కౌన్సిలర్లు ఉండగా.. 20 మంది కాంగ్రెస్ , 20 మంది బీఆర్ఎస్, బీజేపీ, ఇతర కౌన్సిలర్లు 8 మంది ఉన్నారు. చైర్మన్ ఎన్నికప్పుడు బీఆర్ఎస్ బలం సరిపోకపోవడంతో ఐదుగురు ఎమ్మెల్సీలు ఓటు వేసి బీఆర్ఎస్ అభ్యర్థి సైదిరెడ్డిని చైర్మన్ చేశారు. ఇప్పుడు సీన్ రివర్స్ అయింది. బీఆర్ఎస్ నుంచి 8 మంది కౌన్సిలర్లు కాంగ్రెస్లోకి చేరడంతో ఆ పార్టీ బలం 26కు చేరింది. బీఆర్ఎస్ బలం 15కు తగ్గింది. దీంతో ఎమ్మెల్యే ఎన్నికలు అయ్యాక పాలకవర్గంపై అవిశ్వాస తీర్మానం పెడితే కాంగ్రెస్ పార్టీ నెగ్గుతుందని ప్రచారం జరుగుతోంది. గత ఎన్నికల్లో కాంగ్రెస్ చైర్మన్ అభ్యర్థి బుర్రి శ్రీనివాస్ రెడ్డి కాగా, ఆయన ప్రస్తుతం వెంకటరెడ్డితో కలిసి ఎన్నికల ప్రచారం పాల్గొంటున్నారు. ఇటీవల కాంగ్రెస్లో చేరిన వాళ్లలో వైస్ చైర్మన్ అబ్బగోని రమేశ్గౌడ్ కూడా ఉండటం గమనార్హం.
