ఎమ్యెల్యే వర్సెస్ మాజీ ఎమ్యెల్యే..నేడు ఆర్మూర్ మున్సిపాల్టీలో బల నిరూపణ

రెండు వర్గాలుగా చీలిన బీఆర్ఎస్ కౌన్సిలర్లు

నిజామాబాద్, వెలుగు: అర్మూర్ మున్సిపల్ పాలకవర్గ రాజకీయాలు రసవత్తరంగా మారాయి. బీజేపీ ఎమ్మెల్యే రాకేశ్ రెడ్డి వర్సెస్ మాజీ ఎమ్మెల్యే జీవన్ రెడ్డి వర్గాల మధ్య రాజకీయాలు హీటెక్కుతున్నాయి. తాజాగా మున్సిపల్ చైర్ పర్సన్ పండిత్ వినీతను కుర్చీ దించేందుకు సొంత పార్టీ నేతలే అవిశ్వాస తీర్మానం ప్రవేశపెట్టారు. నేడు కలెక్టర్ ఆధ్వర్యంలో మున్సిపల్లో బల నిరూపణ జరుగనుంది.

నెల నుంచి జీవన్రెడ్డి క్యాంపులో..

ఆర్మూర్ మున్సిపాలిటీలో మొత్తం 36 మంది కౌన్సిలర్లుండగా 23 మంది బీఆర్ఎస్ , బీజేపీ నుంచి ఆరుగురు, ఇండిపెండెంట్ కౌన్సిలర్లు ఐదుగురు, ఎంఐఎం 1, కాంగ్రెస్ 1 ఉన్నారు. చైర్ పర్సన్ పదవి బీసీ మహిళకు రిజర్వ్ కావడంతో పండిత్ వినీత పదవి దక్కించుకున్నారు. అప్పటి ఎమ్యెల్యే జీవన్రెడ్డి అండతో బీజేపీ మినహా ఇతర కౌన్సిలర్లందరూ ఆమెకు మద్ధతుగా నిలిచారు. ప్రస్తుతం పలువురు బీఆర్ఎస్ కౌన్సిలర్లు కొందరు ఆమెపై అసంతృప్తి గా ఉన్నారు. వారిని మాజీ ఎమ్మెల్యే జీవన్ రెడ్డి క్యాంపునకు తరలించారు.

మితిమీరిన వ్యవహారం వల్లే!

చైర్పర్సన్ పండిత్ వినీత భర్త పవన్, మరిది పండిత్ ప్రేమ్ మున్సిపల్ వ్యవహారాలలో మితిమీరి జోక్యం చేస్తున్నారని బీఆర్ఎస్ కార్పొరేటర్లు కొందరు అసంతృప్తిలో ఉన్నారు. దీంతో అవిశ్వాసంతో చైర్పర్సన్ను తొలగించాలని భావించారు. గతంలోనే అవిశ్వాస చర్చ వచ్చినప్పటికీ అప్పుడు ఎమ్మెల్యేగాఉన్న జీవన్ రెడ్డి బుజ్జగిస్తూ వచ్చారు. తాజాగా పరిస్థితులు మారడంతో కౌన్సిలర్లు అవిశ్వాసానికి పూనుకున్నారు. జీవన్రెడ్డిని దెబ్బతీయడానికి ఎమ్మెల్యే పైడి రాకేశ్రెడ్డి పావులు కదుపుతున్నట్టు వినిపిస్తోంది. బీఆర్ఎస్ కౌన్సిలర్లలో కొందరినైనా కాపాడుకునేందుకు జీవన్రెడ్డి నెల రోజుల నుంచి హైదరాబాద్లో క్యాంపు రాజకీయాలు నడుపుతున్నారు.

బీజేపీకి చెందిన ఆరుగురితో పాటు ఐదుగురు ఇండిపెండెంట్లు బీఆర్ఎస్ చీలిక వర్గాన్ని కూడగట్టి పండిత్ వినీతను చైర్పర్సన్ కుర్చీ నుంచి దింపాలనే ప్లాన్లో ఉన్నట్టు తెలుస్తోంది. పండిత్ వినీతకు వ్యతిరేకంగా, క్యాంపులో ఉన్న కౌన్సిలర్లతో ఆమెను పదవి నుంచి తప్పించినా.. తిరిగి బీఆర్ఎస్ చైర్పర్సన్కే అవకాశం దక్కేలా చేయాలని జీవన్రెడ్డి భావిస్తున్నారు. కౌన్సిలర్లు పార్టీకి వ్యతిరేకంగా వెళ్లకుండా విప్ జారీ చేయనున్నట్టు సమాచారం. ఇప్పటికే అసెంబ్లీ ఎన్నికల్లో ఓటమి చెందిన జీవన్ రెడ్డి కనీసం మున్సిపల్ అవిశాస్వ రాజకీయాల్లో అయినా గట్టెక్కి ఉనికి కాపాడుకునే ప్రయత్నాలు చేస్తున్నారు.