భద్రాద్రికొత్తగూడెం/భద్రాచలం, వెలుగు : తెలంగాణ రాష్ట్రంలో వచ్చేది కాంగ్రెస్ ప్రభుత్వమేనని, భద్రాద్రి అభివృద్ధికి తామే భరోసా ఇస్తున్నామని మాజీ ఎంపీ పొంగులేటి శ్రీనివాసరెడ్డి, మాజీ మంత్రి తుమ్మల నాగేశ్వరరావు అన్నారు. భద్రాచలం రామాలయంలో మంగళవారం ప్రత్యేక పూజలు చేసిన అనంతరం వారు చర్ల, దుమ్ముగూడెం, భద్రాచలంలలో రోడ్ షోలు నిర్వహించారు. ఈ సందర్భంగా వారు మాట్లాడుతూ ఈ ప్రాంతం అభివృద్ధికి తాము ఎప్పుడూ ముందుంటామన్నారు.
తమ హయాంలో నిర్మించిన బ్రిడ్జిలు, తాలిపేరు ప్రాజెక్టు ఆధునీకరణ పనులు, విద్యుత్ సౌకర్యం, కరకట్టల నిర్మాణాలను వివరించారు. రాముడినే మోసం చేసిన ఘనుడు సీఎం కేసీఆర్ అన్నారు. రాష్ట్రంలో పదేళ్ల కాలంలో ఆయన కుటుంబంలో తప్ప ఏ ఒక్క నిరుద్యోగికి ఉద్యోగం రాలేదన్నారు. మరోసారి పొదెం వీరయ్యను గెలిపించుకుందామని పిలుపునిచ్చారు.
.కేసీఆర్రూ.వంద కోట్లు పంపించిండు
కాంగ్రెస్, టీజేఎస్ మద్ధతుతో కొత్తగూడెంలో సీపీఐ తరుపున పోటీ చేస్తున్న కూనంనేని సాంబశివరావును ఓడించేందుకు కేసీఆర్ కొత్తగూడెం నియోజకవర్గానికి రూ. వంద కోట్లు పంపించారని పొంగులేటి శ్రీనివాస్రెడ్డి ఆరోపించారు. కూనంనేనిని గెలిపించాలని సీపీఐ, కాంగ్రెస్ ఆధ్వర్యంలో కొత్తగూడెం, పాల్వంచ, సుజాతనగర్లో మంగళవారం నిర్వహించిన రోడ్ షోలో కూనంనేని, తుమ్మలతో కలిసి ఆయన మాట్లాడారు.
ALSO READ : ముంపు గ్రామాల సమస్యలను పట్టించుకోలేదు : మేడిపల్లి సత్యం
అక్రమంగా సంపాదించిన డబ్బుతో ఓట్లు కొనేందుకు కేసీఆర్ పన్నుతున్న కుట్రలను ప్రజలు గమనిస్తున్నారన్నారు. కాంగ్రెస్, సీపీఐ, టీజేఎస్ మిత్రపక్షాల సునామీలో బీఆర్ఎస్ కొట్టుకుపోవడం ఖాయమన్నారు. కూనంనేనిని అత్యధిక మెజార్టీతో గెలిపించాల్సిన బాధ్యత కాంగ్రెస్ నేతలు, కార్యకర్తలదేనన్నారు. సీపీఐ, కాంగ్రెస్ నేతలు సాబీర్ పాషా, నాగ సీతారాములు, ఆళ్ల మురళి, నాగేంద్రత్రివేది పాల్గొన్నారు.
