మళ్లీ అంధకారంలోకి రాష్ట్రం...సమైక్య పాలనలోలాంటి పరిస్థితులే కనిపిస్తున్నయ్: కేటీఆర్​

• కాంగ్రెస్​ పాలనలో అవే నిర్బంధాలు, అణచివేతలు 
•  సంపన్న వర్గాల నుంచి అట్టడుగు వర్గాల వరకూ బాధపడుతున్నరు
• తెలంగాణను కాపాడుకునేందుకు మరో సంకల్ప దీక్షకు సిద్ధం కావాలి
• ఈ నెల 29న రాష్ట్రవ్యాప్తంగా దీక్షా దివస్ చేపడుతున్నట్టు వెల్లడి

హైదరాబాద్, వెలుగు: కాంగ్రెస్​కు అధికారమిస్తే రాష్ట్రాన్ని అంధకారంలోకి నెడుతున్నదని బీఆర్ఎస్​ వర్కింగ్​ ప్రెసిడెంట్​ కేటీఆర్​ అన్నారు. సంపన్న వర్గాల నుంచి అట్టడుగు వర్గాల దాకా అందరూ బాధపడుతున్నారని వ్యాఖ్యానించారు. ఉమ్మడి రాష్ట్రంలో కాంగ్రెస్ పాలనతో తెలంగాణలోని ప్రతి వర్గం, ప్రతి మనిషి బతుకు ఛిద్రం అయిందని, మళ్లీ ఇప్పుడు అదే కాంగ్రెస్​ పాలనలో అలాంటి పరిస్థితులే కనిపిస్తున్నాయని  అన్నారు.  కాంగ్రెస్​ సర్కారు రాగానే అవే నిర్బంధాలు, అవే అణచివేతలు, అవే దుర్భర పరిస్థితులు మొదలయ్యాయని తెలిపారు.

ఆదివారం ఆయన తెలంగాణ భవన్​లో మీడియాతో మాట్లాడారు. నాడు ఢిల్లీ మెడలు వంచి తెలంగాణ సాధించిన కేసీఆర్​ స్ఫూర్తితో.. ఇప్పుడు మళ్లీ రెండు జాతీయ పార్టీల మెడలు వంచాల్సిన బాధ్యత ప్రతి పౌరుడిపైనా ఉందన్నారు. కాంగ్రెస్​ కబంధ హస్తాల నుంచి 4 కోట్ల తెలంగాణ ప్రజలను కాపాడుకునేందుకు మరో సంకల్ప దీక్ష చేపట్టాల్సిన అవసరం ఉన్నదని, రాష్ట్రవ్యాప్తంగా ఈ నెల 29న దీక్షా దివస్​ను  నిర్వహించబోతున్నామని చెప్పారు. 

స్వీయ రాజకీయ అస్థిత్వం కావాలె

స్వీయ రాజకీయ అస్థిత్వమే తెలంగాణకు శ్రీరామరక్ష అని ప్రొఫెసర్​ జయశంకర్​ తరచూ చెప్తుండేవారని కేటీఆర్​ గుర్తుచేశారు. కాంగ్రెస్​ పాలనను చూశాక ప్రజలంతా కేసీఆర్​ నాయకత్వాన్ని కోరుకుంటున్నారని, ఆనాటి పాలన మళ్లీ రావాలనుకుంటున్నారని అన్నారు. రాష్ట్రంపై కేసీఆర్​ వేసిన ముద్రను గుర్తు చేసుకుంటూ రెండు జాతీయ పార్టీలకూ బుద్ధి చెప్పేలా ప్రతి కార్యకర్త ముందుకెళ్లాలని సూచించారు.

దీక్షా దివస్​ నిర్వహణకు అన్ని జిల్లాలకూ సీనియర్​ నాయకులను ఇన్​చార్జులుగా నియమించామని చెప్పారు. ఈ నెల 26న అన్ని జిల్లాల్లోనూ సన్నాహక సమావేశాలు నిర్వహిస్తామన్నారు. కేసీఆర్​ దీక్ష ముగించిన డిసెంబర్​ 9న మేడ్చల్​లో తెలంగాణ తల్లి విగ్రహాన్ని ఆవిష్కరిస్తామని తెలిపారు. కేసీఆర్​ దీక్షలో నిమ్స్​ హాస్పిటల్​ పాత్ర కీలకమని, దీక్షా దివస్​ రోజు నిమ్స్​హాస్పిటల్​లో అన్నదానం, రోగులకు పండ్ల పంపిణీ కార్యక్రమాలను చేపట్టాలని పార్టీ శ్రేణులకు పిలుపునిచ్చారు.