- రూ. కోట్ల బిజినెస్
- 2007లో ప్రవాహ్ లేబోరేటరీస్ గా ఏర్పాటు
- 2017 నుంచి శ్రీ యాదాద్రిగా పేరు మార్పు
- ఎంప్లాయిస్కు జీతాలు సరిగా ఇవ్వలే
- గుట్టు రట్టయి చివరకు సీజ్
యాదాద్రి, వెలుగు : మెడిసిన్ తయారు చేయడానికి ఏర్పాటు చేసిన కంపెనీ..పేరు మార్చుకుంది. కంపెనీ ఎంప్లాయీస్కు జీతాలు సరిగా ఇవ్వలే. ప్రాణాలు కాపాడే మెడిసిన్ తయారీ నుంచి మత్తుతో చిత్తు చేసే డ్రగ్స్ తయారుచేసే స్థితికి చేరుకుంది. చివరకు సీజ్ అయింది. 2007లో ప్రవాహ్ ల్యాబొరేటరీ పేరుతో యాదాద్రి జిల్లా యాదగిరిగుట్ట మండలం రామాజీపేట శివారులో ఈ కంపెనీ ఏర్పడింది. ఈ కంపెనీలో మెడిసిన్ కోసం పౌడర్ తయారు చేసి ప్రముఖ ల్యాబ్లకు సరఫరా చేసేవారు. ఈ కంపెనీలో వెటర్నరీ మెడిషన్ కూడా తయారు చేసేవారు.
అయితే కంపెనీ ఏర్పాటులో కీలకమైన వ్యక్తి మృతి చెందిన తర్వాత ఇబ్బందులకు గురైంది. 2017 నుంచి శ్రీ యాదాద్రి ఫార్మాస్యూటికల్ కంపెనీగా పేరు మార్చుకొని హైదరాబాద్లోని బాలానగర్లో కార్పొరేట్ కార్యాలయం ఏర్పాటు చేసి, కార్యకలాపాలు నిర్వహిస్తున్నారు. ఈ కంపెనీకి ప్రస్తుతం వాసుదేవరావు పర్యవేక్షిస్తున్నారు. ఇందులో టెక్నిషియన్గా ఉంటున్న సంతోష్ (ఇతడిని పోలీసులు అరెస్ట్ చేశారు) తల్లి కంపెనీ బోర్డు మెంబర్గా ఉన్నారు. అనంతర అందులో పని చేసే ఎంప్లాయిస్కు జీతాలు ఇవ్వలేని స్థితికి చేరుకుంది.
చాలా మంది ఎంప్లాయిస్కు ఆరు నెలలకు పైగా జీతాలు బకాయిలు ఉన్నట్టు చెబుతున్నారు. దీంతో ఎంప్లాయిస్ ఉద్యోగాలు మానేసి వేర్వేరు చోట్ల చేరిపోయారు. ఇటీవలే పొల్యూషన్ కంట్రోల్ బోర్డు మూడుసార్లు నోటీసులు జారీ చేసింది. దీంతో ఈ కంపెనీల్లో కార్యకలాపాలు నిలిపివేశారు. ఈ పరిస్థితుల్లో జీడిమెట్లకు చెందిన ఇస్మాయిల్ పరిచయంతో నిషేధిత మత్తు పదార్థాలైన ఎఫెడ్రిస్, మెఫెడ్రోస్ తయారీకి తెరలేపారు. వీటిని తయారు చేయడంతో పాటు రవాణా చేస్తూ రూ. కోట్ల బిజినెస్ చేస్తున్నారు. వీటిని రవాణా చేయడానికి పక్కా ప్రణాళికతో వ్యవహరిస్తున్నారు.
పోలీసుల కంట్లో పడకుండా టోల్గేట్లు తప్పించుకునే విధంగా రూట్ మ్యాప్ తయారు చేసుకొని తరలిస్తున్నారు. మత్తు పదార్థాలను తరలించే వెహకల్కు ఎస్కార్ట్ గా మరో వెహికల్ సమకూరుస్తూ దొరకకుండా తప్పించుకుంటున్నారు. చివరకు పక్కా సమాచారంతో తెలంగాణ యాంటీ నార్కోటిక్ బ్యూరో, జిల్లా పోలీసుల ద్వారా శ్రీ యాదాద్రి ఫార్మాస్యూటికల్ కంపెనీ డ్రగ్స్ దందా గుట్టును రట్టయి కంపెనీ సీజ్ చేసేవరకూ వెళ్లింది. మెడిసిన్ తయారీ కోసం ఏర్పాటు చేసిన కంపెనీ డ్రగ్ తయారు చేస్తున్న విషయం జిల్లాలో ఇప్పుడు చర్చనీయాంశంగా మారింది.
