న్యూఢిల్లీ: పార్లమెంట్ ఉభయ సభలు పాస్ చేసిన వక్ఫ్(సవరణ) బిల్లు, 2025కు రాష్ట్రపతి ద్రౌపది ముర్ము శనివారం ఆమోదం తెలిపారు. రాష్ట్రపతి ఆమోదించిన వెంటనే ఈ బిల్లు చట్టరూపం దాల్చింది. వక్ఫ్బోర్డుల అధీనంలోని ఆస్తుల నిర్వహణలో పారదర్శకత కోసమని కేంద్రంలోని ఎన్డీయే సర్కారు తెచ్చిన ఈ బిల్లుపై పార్లమెంట్ ఉభయసభల్లో వాడివేడిగా సుదీర్ఘ చర్చలు జరిగాయి. లోక్ సభ బుధవారం రాత్రి, రాజ్యసభ గురువారం రాత్రి ఈ బిల్లును ఆమోదించాయి. లోక్సభ లో బుధవారం అర్ధరాత్రి దాటిన తర్వాత జరిగి న ఓటింగ్లో బిల్లుకు అనుకూలంగా 288 మంది, వ్యతిరేకంగా 232 మంది ఎంపీలు ఓటేశారు.
రాజ్యసభలో గురువారం అర్ధరాత్రి దాటిన తర్వాత జరిగిన ఓటింగ్లో బిల్లుకు అనుకూలంగా 128 మంది, వ్యతిరేకంగా 95 మంది సభ్యులు ఓటేశారు. ఉభయసభల్లో పాస్ అయిన తర్వాత బిల్లును కేంద్రం రాష్ట్రపతి ఆమోదం కోసం పంపగా, తాజాగా ఆ ప్రక్రియ కూడా పూర్తయి చట్టంగా మారింది. అయితే, వక్ఫ్ బిల్లుపై దేశవ్యాప్తంగా మైనార్టీ వర్గాలు, కాంగ్రెస్, లెఫ్ట్, ఇతర పార్టీలు నిరసనలు తెలిపాయి. ఈ బిల్లు రాజ్యాంగ విరుద్ధమని, దీనిని కొట్టివేయాలంటూ కాంగ్రెస్, ఎంఐఎం, ఆమ్ ఆద్మీ పార్టీ నేతలు సుప్రీంకోర్టును సైతం ఆశ్రయించారు.
