న్యూఢిల్లీ: ప్రధాని మోదీ శనివారం అమెరికా పర్యటనకు బయలుదేరి వెళ్లారు. ఆయన ఈ నెల 23వ తేదీ వరకు మూడు రోజులపాటు అగ్రరాజ్యం అమెరికాలో పర్యటించనున్నారు. ఈ సందర్భంగా అమెరికా ప్రెసిడెంట్ జో బైడెన్ స్వస్థలమైన డెలావేర్లోని విల్మింగ్టన్లో జరగనున్న క్వాడ్ లీడర్స్నాలుగో శిఖరాగ్ర సమావేశంలో మోదీ పాల్గొననున్నారు. ఈ సమిట్కు జో బైడెన్ ఆతిథ్యం ఇస్తున్నారు. అలాగే, ఈ సదస్సు వేదికగానే జోబైడెన్తోపాటు ఇతర ప్రపంచ నేతలతో మోదీ ద్వైపాక్షిక చర్చలు జరుపుతారు.
క్వాడ్ సమిట్లో ఇండో పసిఫిక్ రీజియన్లో సహకారాన్ని పెంపొందించడం, రష్యా–ఉక్రెయిన్, ఇజ్రాయెల్–హమాస్ యుద్ధాలకు పరిష్కార మార్గాలపై చర్చించనున్నారు. అలాగే, క్యాన్సర్ గుర్తింపు, చికిత్స, నివారణ, రోగులు, వారి కుటుంబ సభ్యులపై ప్రభావాన్ని తగ్గించేందుకు సరికొత్త ఆవిష్కరణలను సెట్ చేస్తారు. ఇండో–పసిఫిక్లో శాంతి, పురోగతి, స్థిరత్వంపై దృష్టిసారిస్తారని, ఆరోగ్య భద్రత, వాతావరణ మార్పులు, అభివృద్ధి చెందుతున్న సాంకేతికతలు, మౌలిక, సదుపాయ రంగాల్లో సహకారం, కనెక్టివిటీ, కౌంటర్ టెర్రరిజంపై నేతలు చర్చిస్తారని విదేశాంగ కార్యదర్శి విక్రమ్ మిస్రీ తెలిపారు.
కాగా, ఆదివారం లాంగ్ఐలాండ్లో ప్రవాస భారతీయులతో మోదీ భేటీ అవుతారు. ఏఐ, క్వాంటం కంప్యూటింగ్, సెమీ కండక్టర్స్లాంటి అధునాతన సాంకేతికతలపై పనిచేస్తున్న అమెరికా సంస్థల సీఈవోలతో రౌండ్టేబుల్ సమావేశంలో పాల్గొంటారు. చివరిరోజు న్యూయార్క్లోని యునైటెడ్ నేషన్స్ జనరల్ అసెంబ్లీలో ‘సమిట్ఆఫ్ ద ఫ్యూచర్’ సదస్సులో మోదీ ప్రసంగిస్తారు. ‘మెరుగైన భవిష్యత్తు కోసం అనుకూల పరిష్కారాలు’ అనే అంశంపై మాట్లాడుతారు.
క్వాడ్ కీలక వేదిక: మోదీ
ఇండో–పసిఫిక్ ప్రాంతంలో శాంతి, శ్రేయస్సుపై దృష్టిసారించే భావజాలం కలిగిన దేశాలకు క్వాడ్కీలక వేదిక అని ప్రధాని మోదీ తెలిపారు. శనివారం అమెరికా పర్యటనకు వెళ్తున్న సందర్భంగా మోదీ ట్విట్టర్లో తన అభిప్రాయాన్ని పంచుకున్నారు. ‘‘నా సహచరులు అమెరికా ప్రెసిడెంట్ జో బైడెన్, ఆస్ట్రేలియా ప్రధాని ఆల్బనీస్, జపాన్ ప్రధాని కిషిడతో భేటీ అయ్యేందుకు ఎదురుచూస్తున్నా” అని పేర్కొన్నారు. ఈ సమావేశం దేశ, ప్రపంచ ప్రయోజనాలకు ఉపయోగపడుతుంది అని తెలిపారు.
భారత్–యూఎస్ సమగ్ర ప్రపంచ వ్యూహాత్మక భాగస్వామ్యాన్ని మరింత బలోపేతానికి కొత్త మార్గాలను సమీక్షించేందుకు, గుర్తించేందుకు బైడెన్తో సమావేశం తోడ్పడుతుందని చెప్పారు. ‘‘ ప్రపంచంలోని అతిపెద్ద, పురాతన ప్రజాస్వామ్య దేశాల మధ్య విశిష్ట భాగస్వామ్యానికి చైతన్యం తీసుకురావడంలో కీలక వాటాదారులుగా ఉన్న ప్రవాస భారతీయులు, ముఖ్యమైన అమెరికా బిజినెస్ లీడర్లతో సమావేశమయ్యేందుకు ఎదురుచూస్తున్నా” అని మోదీ వెల్లడించారు.
