- మోదీ పర్యటనతో మారిన బీజేపీ ప్రచార శైలి
- పసుపు బోర్డు, గల్ఫ్ కష్టాలు, చక్కెర ఫ్యాక్టరీలే అస్త్రాలుగా ముందుకెళ్తున్న లీడర్లు
నిజామాబాద్, వెలుగు : నిజామాబాద్లో ప్రధాని మోదీ పర్యటనతో జిల్లా బీజేపీలో ఫుల్జోష్ వచ్చింది. పసుపు బోర్డు, గల్ఫ్ కష్టాలు, చక్కెర ఫ్యాక్టరీలే అస్త్రాలుగా లీడర్లు ప్రజల్లోకి వెళ్తున్నారు. గెలుపునకు పక్కా ప్రణాళికను రూపొందిస్తున్నారు. ఇన్నాళ్లూ బీఆర్ఎస్, కాంగ్రెస్ పార్టీలపై ఆరోపణలు, విమర్శలకే పరిమితమైన ‘కమలం’ నేతల్లో మోదీ హామీలు ఉత్సాహాన్ని నింపాయి.
బలం.. బాణాలు ఇవే..
- నిజామాబాద్ పార్లమెంట్నియోజకవర్గం పరిధిలోని ఆర్మూర్, బాల్కొండ, రూరల్, జగిత్యాల అసెంబ్లీ సెగ్మెంట్లలో సుమారు 40 వేల ఎకరాల్లో పసుపు సాగు అవుతోంది. పాలమూరు వేదికగా ప్రధాని మోదీ పసుపు బోర్డు ప్రకటించడం, కేంద్ర క్యాబినెట్ కూడా బుధవారం దీనిని ఆమోదించడంతో రైతుల్లో నమ్మకం పెరిగింది. ఎన్నో ఏండ్ల కల నెరవేరుతున్నందున సంతోషంలో ఉన్నారు. ఈ క్రమంలో బీజేపీ లీడర్లు పసుపు సాగయ్యే ప్రాంతాల్లో పసుపు బోర్డు మీదే ప్రచారాన్ని నిర్వహించనున్నారు. ముఖ్య నేతలకు పూల దండల స్థానంలో పసుపు కొమ్మల దండలు, బొకేగా పసుపు ఆకు, వేడుకలప్పుడు పసుపు రంగు చల్లుకునేలా ప్లాన్ చేస్తున్నారు.
- ఉమ్మడి నిజామాబాద్, కరీంనగర్ జిల్లాల యువకులు చాలాకాలంగా ఉపాధి కోసం గల్ఫ్ వెళ్తున్నారు. ఈ అంశాన్ని బీజేపీ ఎన్నికల మేనిఫెస్టోలో చేర్చనుంది. ఏజెంట్ల చేతిలో మోసపోకుండా గల్ఫ్ వెళ్లేవారికి వీసా మొదలుకొని రవాణా ఖర్చులు, ఏదైనా కారణంతో వారు మృతి చెందితే గవర్నమెంట్ఖర్చుతో డెడ్బాడీలను తీసుకువచ్చే హామీ ఇవ్వనున్నారు. ఈ అంశం కూడా పార్టీకి మంచి మైలేజీ తెస్తుందనే ఆశతో లీడర్లు ఉన్నారు.
- 2015లో బోధన్, మెట్పల్లిలో నిజాం షుగర్ ఫ్యాక్టరీలు, అంతకు ఐదేండ్ల ముందు రూరల్ నియోజకవర్గం పరిధిలో సారంగాపూర్ కో-ఆపరేటివ్ చక్కెర మిల్లు మూతబడ్డాయి. వీటిని పునరుద్ధరించాలనే డిమాండు కార్మికులు, చెరకు రైతుల నుంచి ఉంది. లోక్సభ ఎలక్షన్కు ముందు ఫ్యాక్టరీలు తెరువాలని అర్వింద్ మెట్పల్లి నుంచి బోధన్దాకా పాదయాత్ర చేశారు. పసుపు బోర్డు సాధించిన ధీమాతో ఇక చక్కెర ఫ్యాక్టరీల సంగతి తేలుస్తానని ఎంపీ అర్వింద్ మంగళవారం ప్రకటించారు. పసుపు బోర్డు హామీ నిలబెట్టుకున్న ఎంపీ అర్వింద్ క్రేజ్ జిల్లాలో మరింత పెరిగింది. ఇవే బీజేపీ లీడర్లకు ప్రచారాస్త్రాలు, ప్రధాన బలంగా మార్చుకుని ప్రజల్లోకి వెళ్లేందుకు ప్లాన్ చేస్తున్నారు.
