- వృద్ధుడు మృతి..నాలుగు కార్లు ధ్వంసం
కూకట్పల్లి, వెలుగు: కూకట్పల్లిలో ప్రైవేటు ట్రావెల్స్ బస్సు బీభత్సం సృష్టించింది. డ్రైవర్ నిర్లక్ష్యం, ఓవర్ స్పీడ్ గా నడపడంతో వృద్ధుడు చనిపోయాడు. నాలుగు కార్లు ధ్వంసమయ్యాయి. కూకట్పల్లిలో ఉండే నారాయణ్ అనిల్కుమార్ కేపీహెచ్బీకాలనీలో టెంపుల్ బస్టాప్లో ప్రైవేటు ఉద్యోగం చేస్తుంటాడు. డ్యూటీ ముగించుకుని స్కూటీపై సోమవారం రాత్రి ఇంటికి బయలుదేరాడు. 11 గంటలకు కూకట్పల్లి పిల్లర్ నెంబర్ 816 వద్ద వెనుక నుంచి వచ్చిన కాకతీయ ట్రావెల్స్ బస్సు ఢీకొట్టటంతో తీవ్రంగా గాయపడ్డాడు. స్కూటీతో పాటు ముందు ఉన్న కార్లను కూడా బస్సు ఢీకొట్టటంతో వరుసగా నాలుగు కార్లు ధ్వంసమయ్యాయి. బాధితుడిని దవాఖానకు తరలించగా చికిత్స పొందుతూ
మంగళవారం చనిపోయాడు.
బైకు ఢీ కొనడంతో ..
కేపీహెచ్బీ పోలీసుస్టేషన్ పరిధిలో రెండు బైకులు ఢీ కొనడంతో ఏపీలోని పల్నాడు జిల్లా కారంపూడికి చెందిన మున్నంగి పవన్కుమార్రెడ్డి(26) చనిపోయాడు. సంవత్సరం క్రితం నగరానికి వచ్చిన పవదన్ ఆరో ఫేజ్లోని హరిహర మెన్స్ పీజీలో ఉంటూ డ్రైవర్గా పని చేస్తున్నాడు. సోమవారం రాత్రి బైక్పై శ్రీల ప్రైడ్ పార్క్ నుంచి గోకుల్ ప్లాట్స్ వెళ్తుండగా అతి వేగంతో వచ్చిన మరో బైక్ ఢీకొట్టింది. దీంతో కిందపడ్డ పవన్కుమార్రెడ్డి స్పాట్లోనే మృతి చెందాడు.
పరిగి : వికారాబాద్ జిల్లా పరిగి మండలం నరసయ్య గూడ గేట్ సమీపంలో మంగళవారం మధ్యాహ్నం బస్సు బైక్ ను ఢీకొట్టడంతో ఓ వ్యక్తి మృతి చెందాడు. ఖుదా వందపూర్ కు చెందిన ఈడిగి ఆంజనేయులు (41), అల్లాపూర్ గ్రామానికి చెందిన సున్నాల ఆంజనేయులుతో కలిసి కలిసి మంగళవారం మధ్యాహ్నం పరిగికి వచ్చాడు. తిరిగి ఖుదాన్పూర్ వెళ్తుండగా పరిగి నుంచి షాద్నగర్వెళ్తున్న ఆర్టీసీ బస్సు ఢీ కొట్టింది. తీవ్రంగా గాయపడ్డ ఆంజనేయులును పరిగి దవాఖానకు తరలిస్తుండగా మృతి చెందాడు. ఆంజనేయులు గాయపడ్డాడు. పరిగి ఎస్ఐ సంతోష్ కుమార్ కేసు నమోదు చేసుకుని దర్యాప్తు చేస్తున్నారు.
