- మూడు సీజన్ల నుంచి సీన్ రిపీట్
- జనవరి నుంచి తెల్లరేషన్ కార్డు లబ్ధిదారులకు సన్న బియ్యం పంపిణీ
- కస్టం మిల్లింగ్ అశ్రద్ధ చేస్తే పంపిణీ కష్టం
- టార్గెట్ కన్నా తక్కువ కొనుగోలు
నిజామాబాద్, వెలుగు: నిజామాబాద్ జిల్లాలో వరి సాగు విస్తీర్ణానికి అనుగుణంగా ధాన్యం కొనుగోళ్లు కేంద్రాలను సకాలంలో ఏర్పాటుచేయకపోవడంతో లక్ష్యం మేర కొనుగోళ్లు జరగడంలేదు. దీంతో గత మూడు సీజన్ల నుంచి ప్రైవేట్ మిల్లర్లదే పైచేయిగా ఉంది. జనవరి నుంచి రేషన్ కార్డులకు సన్నబియ్యం పంపిణీ చేయాలని సర్కారు నిర్ణయించింది. ఆ మేరకు వడ్ల కొనుగోళ్ల టార్గెట్ను భారీగా ప్రకటించినా యంత్రాంగం సక్సెస్ కాలేదు. కొనుగోలు చేసిన వడ్లతో జిల్లా వరకు ఢోకాలేకున్నా, సీఎంఆర్ సేకరణపై మొదటి నుంచి ఫోకస్ పెడ్తేనే అది సాధ్యమవుతుంది.
4.30 లక్షల ఎకరాల్లో వరి సాగు
నిజామాబాద్జిల్లా రైతులు వరిసాగు వైపు మొగ్గు చూపుతున్నారు. మద్దతు ధరకు తోడు సన్నాలకు ప్రభుత్వం రూ.500 బోనస్ ప్రకటించడంతో వరిసాగుపై ఆసక్తి చూపుతున్నారు. ఖరీఫ్లో 4.30 లక్షల ఎకరాల విస్తీర్ణంలో వరిని పండించగా, అందులో 80 శాతం సన్నరకం సాగు చేశారు. 12 లక్షల మెట్రిక్ టన్నులు దిగుబడి వస్తుందని అంచనా వేసి 8 లక్షల టన్నులు కేంద్రాల ద్వారా కొనుగోలు చేయాలని టార్గెట్ పెట్టుకున్నారు. నిజాంసాగర్ ప్రాజెక్టు పరిధిలోని బాన్సువాడ, బోధన్, రూరల్ సెగ్మెంట్లో వరి కోతలు అక్టోబర్ మొదటి వారం షురువై ఆ నెలాఖరునాటికి దాదాపు ముగిశాయి. నవంబర్ మొదటి వారంలో సర్కారు కొనుగోలు కేంద్రాలు ప్రారంభించే నాటికి సుమారు 7 లక్షల మెట్రిక్ టన్నుల ధాన్యం మిల్లర్లే కొనుగోలు చేశారు.
Also Read : మరో 27,612 రైతులకు రుణమాఫీ
కస్టం మిల్లింగ్కు సంబంధించి సర్కారు విధివిధానాల రూపకల్పనలో జాప్యం కూడా ప్రభుత్వ కొనుగోళ్లపై ప్రభావం చూపింది. వాతావరణం సరిగా లేకపోవడంతో రైతులు సెంటర్లు ఓపెన్ అయ్యేవరకు వెయిట్ చేయకుండా ప్రైవేట్ వ్యాపారులకు వడ్లు అమ్ముకున్నారు. దీంతో కొనుగోలు కేంద్రాల్లో4.90 లక్షల టన్నులే కొన్నారు. అందులో సన్నాలు సుమారు 3 లక్షల టన్నులు, దొడ్డురకం 1.90 లక్షల టన్నులు ఉన్నాయి. 2023–-24 యాసంగిలో మొత్తం 11.72 లక్షల మెట్రిక్ టన్నుల వడ్ల దిగుబడి వచ్చింది. 6 లక్షల టన్నుల కొనుగోలు టార్గెట్పెట్టుకొని 4.33 లక్షల టన్నులే కొనుగోలు చేశారు. అంతకు ముందు ఖరీఫ్లో కొనుగోళ్లు 4 లక్షల టన్నులకే పరిమితమయ్యాయి. 2022-–23 రెండు సీజన్లలో 5.85 లక్షల టన్నుల ధాన్యం కొనుగోలు చేశారు.
సీఎంఆర్ కీలకం
కల్లాల్లో ధాన్యం చేరే సమయానికి ముందే సర్కారు కొనుగోలు కేంద్రాలు ప్రారంభిస్తే రైతులు వడ్లను తరలిస్తారు. ఎక్కువ కొనుగోళ్లతో జిల్లా అవసరాలుపోను పొరుగు జిల్లాలకు బియ్యం సరఫరా చేసే వీలుంటుంది. జనవరి నుంచి రాష్ట్రవ్యాప్తంగా రేషన్కార్డులకు సన్న బియ్యం సరఫరా చేయాలనే ప్రభుత్వ నిర్ణయం మేరకు జిల్లాలోని 4.02 లక్షల కార్డులకు లబ్ధి చేకూరనుంది. రేషన్ కార్డులు, ప్రభుత్వ హాస్టల్స్, మిడ్డే మీల్స్ తదితర వాటికి కలిపి ప్రతీనెలా సుమారు 9 వేల మెట్రిక్ టన్నుల చొప్పున ఏడాదికి 1.08 లక్షల టన్నుల రైస్ కావాలి.
ఈ ఖరీఫ్లో కొనుగోలు చేసిన 3.20 లక్షల టన్నుల సన్నవడ్ల నుంచి 1.97 లక్షల టన్నుల బియ్యం సీఎంఆర్గా వస్తాయి. కస్టం మిల్లింగ్ బియ్యం పట్ల మొదటి నుంచి ఫోకస్ పెడితేనే అంతా సాఫీగా జరుగుతుంది. ఇప్పటికే 2023–-24 రెండో సీజన్కు చెందిన 2.07 లక్షల టన్నుల సీఎంఆర్ రైస్ మిల్లర్ల వద్ద బాకీ ఉన్నాయి. అందుకు సంబంధించిన వడ్లు పక్కదారి పట్టాయని విజిలెన్స్ విచారణ నడుస్తోంది.
