ఇబ్రహీంపట్నం, వెలుగు: ఆన్లైన్బెట్టింగ్తో అప్పుల పాలైన ఓ ప్రైవేట్ టీచర్ చైన్స్నాచింగ్స్ కు పాల్పడుతూ పోలీసులకు చిక్కాడు. ఇబ్రహీంపట్నం ఏసీపీ రాజు తెలిపిన వివరాల ప్రకారం నల్గొండ జిల్లా పీఏపల్లి మండలం వద్దిపట్లకు చెందిన బొంత అనిల్ ఎమ్మెస్సీ పూర్తిచేశాడు. చంపాపేటలో ఉంటూ ప్రైవేటుగా ట్యూషన్లు చెబుతున్నాడు. ఆన్లైన్బెట్టింగ్ కు అలవాటుపడిన అనిల్లక్షల్లో డబ్బు పోగొట్టుకున్నాడు. రూ.3లక్షల వరకు అప్పులు చేశాడు.
వాటిని తీర్చేందుకు కొన్ని రోజుల కింద పహాడీషరీఫ్ లోని ఓ మహిళ మెడలోని పుస్తెలతాడు చోరీ చేశాడు. వారం కింద ఇబ్రహీంపట్నం శేరిగూడలో పశువులు మేపుతున్న భారతమ్మ మెడలోని పుస్తెల తాడు గుంజుకుని పారిపోయాడు. సోమవారం మంగల్ పల్లి సమీపంలో వాహనాలు తనిఖీ చేస్తున్న పోలీసులకు అనిల్అనుమానంగా కనిపించడంతో విచారించగా చోరీలు బయటపడ్డాయి. 7 తులాల బరువున్న రెండు పుస్తెల తాడులను స్వాధీనం చేసుకున్నారు. నిందితుడిని రిమాండుకు తరలించినట్లు ఇబ్రహీంపట్నం సీఐ సత్యనారాయణ, ఎస్సై నాగరాజు తెలిపారు.
