భద్రాద్రికొత్తగూడెం, వెలుగు : ఈనెల 28 నుంచి జనవరి 6 వరకు నిర్వహించనున్న ప్రజా పాలన ప్రోగ్రామ్కు ఏర్పాట్లు చేయాలని జిల్లా ఆఫీసర్లను కలెక్టర్ డాక్టర్ ప్రియాంక అల ఆదేశించారు. జిల్లాలోని పలు శాఖల అధికారులు, మున్సిపల్ కమిషనర్లు, స్పెషల్ ఆఫీసర్లతో సోమవారం నిర్వహించిన టెలీ కాన్ఫరెన్స్లో ఆమె మాట్లాడారు. మంగళవారం ఖమ్మం కలెక్టరేట్లో జిల్లా ఇన్చార్జి మంత్రి కోమటిరెడ్డి వెంకటరెడ్డి ప్రజాపాలనపై రివ్యూ నిర్వహించనున్నారని తెలిపారు.
ఉదయం 9.30 గంటలకు మీటింగ్ ప్రారంభం కానున్నదని తెలిపారు. ఈ మీటింగ్కు అడిషనల్ కలెక్టర్లు, జిల్లా అధికారులు, ఎంపీడీఓలు, తహసీల్దార్లు, మున్సిపల్ కమిషనర్లు, డివిజన్ స్థాయి ఆఫీసర్లు అటెండ్ కావాలన్నారు. ప్రజా పాలన ప్రోగ్రాం ఉదయం 8 గంటల నుంచి 12 గంటల వరకు, మధ్యాహ్నం 2 గంటల నుంచి సాయంత్రం 6 గంటల వరకు కొనసాగుతుందని చెప్పారు. మహాలక్ష్మి, రైతు భరోసా, గృహజ్యోతి, ఇందిరమ్మ ఇండ్లు, చేయూత స్కీమ్లకు దరఖాస్తులు తీసుకోవాల్సి ఉంటుందన్నారు. ఈ కార్యక్రమంలో అడిషనల్ కలెక్టర్లు డాక్టర్ పి. రాంబాబు, మధుసూదనరాజు, డీపీఓ రమాకాంత్, జడ్పీ సీఈఓ విద్యాలతో పాటు పలు శాఖల అధికారులు పాల్గొన్నారు.
