హైదరాబాద్, వెలుగు: దేశవ్యాప్తంగా మెడికల్ కాలేజీల్లో అడ్మిషన్లకు నిర్వహించిన నీట్ ఎగ్జామ్ ఫలితాలపై సమగ్ర విచారణ చేయించాలని ఎస్ఎఫ్ఐ, ఏఐఎస్ఎఫ్, పీడీఎస్యూ విద్యార్థి సంఘాలు కేంద్ర ప్రభుత్వాన్ని డిమాండ్ చేశాయి. లోక్ సభ ఎన్నికల ఫలితాలు రిలీజ్ అవుతున్న సమయంలోనే, నీట్ ఫలితాలను ప్రకటించడం పేరెంట్స్ లో అనుమానాలు కలిగిస్తున్నాయని ఎస్ఎఫ్ఐ రాష్ట్ర అధ్యక్షుడు ఆర్ఎల్.మూర్తి, కార్యదర్శి నాగరాజు, ఏఐఎఫ్ఎస్ రాష్ట్ర అధ్యక్షుడు మణికంఠరెడ్డి, కార్యదర్శి లక్ష్మణ్, పీడీఎస్యూ రాష్ట్ర అధ్యక్షుడు పరుశురామ్ వేర్వేరు ప్రకటనల్లో పేర్కొన్నారు.
ఒకే సెంటర్ లో వరుస రూల్ నెంబర్లుగా ఉన్న విద్యార్థులకు ఒకే మార్కులు పొందడం, దేశవ్యాప్తంగా 62 మంది విద్యార్థులకు 720/720 మార్కులు రావడం ఏంటని ప్రశ్నించారు. ఎన్టీఏ వచ్చినప్పటి నుంచి పరీక్షల్లో పారదర్శకతపై అనేక అనుమానాలు వ్యక్తమవుతున్నాయన్నారు. ఎన్‌‌‌‌‌‌‌‌ఎంసీ, ఎన్టీఏ సంయుక్తంగా వైద్య విద్యను ప్రైవేటీకరించిన తీరు దేశ భవిష్యత్తుకు ప్రమాదకరంగా మారుతోందన్నారు. ఈ అంశంపై వెంటనే స్పందించి, పారదర్శకంగా విచారణ చేయించాలన్నారు. అవసరమైతే రీ ఎగ్జామ్ నిర్వహించడంతోపాటు ఎన్టీఏను రద్దు చేయాలని డిమాండ్ చేశారు.
