పెబ్బేరు, వెలుగు: వనపర్తి జిల్లా పెబ్బేరు పట్ణణంలోని బ్రహ్మారెడ్డి ప్రజా వైద్యశాలలో వైద్యుల నిర్లక్ష్యంతో గర్భిణి సరిత అలియాస్ పుష్పలత(22) మృతిపై రాష్ట్ర అధికార బృందం విచారణ చేపట్టింది. జులై 29న ‘వెలుగు’ దినపత్రికలో వచ్చిన వార్తకు స్పందించిన కలెక్టర్ ఆదర్శ్ సురభి విచారణకు ఆదేశించారు. బుధవారం డిప్యూటీ డీఎంహెచ్వో శ్రీనివాసులు, మాస్ మీడియా ఆఫీసర్ చంద్రయ్య హాస్పిటల్ యాజమాన్యానికి షోకాజ్ నోటీసులు జారీ చేశారు.
రాష్ట్ర కుటుంబ ఆరోగ్య సంక్షేమ శాఖ కమిషనర్ మెటర్నల్ డెత్ కింద కేసు నమోదు చేసి గర్భిణి మృతికి గల కారణాలను తెలుసుకునేందుకు ఐదుగురు సభ్యులతో కూడిన బృందాన్ని పెబ్బేరుకు పంపించారు. వారు హాస్పిటల్ను సందర్శించి గర్భిణి వివరాలను సేకరించారు. ఆమె హాస్పిటల్కు ఎన్ని సార్లు వచ్చింది? ఏ మందులు, ఇంజక్షన్లు వాడారు? ట్రీట్మెంట్ చేసిన నర్సుల వివరాలను తెలుసుకున్నారు. కర్నూల్ తీసుకెళ్లిన అంబులెన్స్ డ్రైవర్, మృతురాలి కుటుంబసభ్యులతో మాట్లాడారు.
కర్నూల్లోని కిమ్స్ హాస్పిటల్కు వెళ్లి విచారణ జరుపుతామని పేర్కొన్నారు. పోస్టుమార్టం చేసిన ఆసుపత్రి రిపోర్టులు సేకరించి సరిత మృతికి గల కారణాలతో రూపొందించిన నివేదికను సీడబ్ల్యూఎఫ్ కమిషనర్ కర్ణన్కు అందజేస్తామని డాక్టర్ కిరణ్మయి తెలిపారు. ప్రోగ్రామింగ్ ఆఫీసర్లు మంజుల, రాజశేఖర్, హెల్త్ సూపర్వైజర్ నర్సింగరావు, డీడీఎం గిరిజ పాల్గొన్నారు.
