- ఉత్తర్వులు జారీ చేసిన రాష్ట్ర ప్రభుత్వం
- 60 వార్డులతో కార్పొరేషన్గా ఏర్పాటు
- ఫిబ్రవరి 6వ తేదీలోపు విలీన జీపీల రిపోర్ట్ ఇవ్వాలని ఆదేశాలు
మహబూబ్నగర్, వెలుగు: మహబూబ్నగర్ మున్సిపాలిటీని కార్పొరేషన్గా అప్గ్రేడ్ చేస్తున్నట్లు ప్రొసిడింగ్స్ జారీ అయ్యాయి. ఈ మేరకు సోమవారం ఉత్తర్వులను రాష్ట్ర ప్రభుత్వం విడుదల చేసింది. మహబూబ్నగర్ రూరల్ మండలంలోని దివిటిపల్లి, జైనల్లీపూర్ గ్రామ పంచాయతీలను కలుపుతూ కార్పొరేషన్గా ఏర్పాటు చేస్తున్నట్లు ప్రకటన వెలువడడంతో పాలమూరు ప్రజలు ఫుల్ హ్యాపీగా ఉన్నారు.
49 వార్డుల నుంచి 60 డివిజన్లకు..
మహబూబ్నగర్ మున్సిపాలిటీలో ఇప్పటి వరకు 49 వార్డులు ఉన్నాయి. అయితే దివిటిపల్లి, జైనల్లీపూర్ గ్రామ పంచాయతీలను కలుపుకోవడంతో అదనంగా 11 డివిజన్లు ఏర్పాటు కానున్నాయి. దీంతో కార్పొరేషన్ 60 డివిజన్లతో ఆవిర్భవించనుంది. ఇప్పటికే మున్సిపల్ పాలకవర్గం పదవీ కాలం ముగిసింది. కౌన్సిలర్లు, చైర్మన్, వైస్ చైర్మన్లు తిరిగి పోటీ చేసేందుకు సిద్ధం అవుతున్నారు. వార్డులు పెరగడంతో ఆశావహులు కూడా పెరిగే చాన్స్ ఉంది.
జీపీల వివరాలు ఇవ్వాలని ఆదేశాలు..
జైనల్లీపూర్, దివిటిపల్లి గ్రామ పంచాయతీలకు సంబంధించిన అన్ని వివరాలు అందజేయాలని మహబూబ్నగర్ మున్సిపల్ కమిషనర్ను ఉన్నతాధికారులు ఆదేశించారు. ఈ జీపీలకు చెందిన ఎగ్జిక్యూటివ్, స్పెషల్ ఆఫీసర్ల నుంచి చార్జ్ తీసుకోవాలని అందులో పేర్కొన్నారు. జీపీలకు చెందిన మినిట్స్ బుక్స్ను సీజ్ చేయాలని.. ఈ జీపీల బ్యాంక్ అకౌంట్లను క్లోజ్ చేయడంతో పాటు ‘కమిషనర్ ఆఫ్ మహబూబ్నగర్ మున్సిపల్ కార్పొరేషన్’ పేరు మీద ఏదైనా జాతీయ బ్యాంకులో అకౌంట్ ఓపెన్ చేయాలని స్పష్టం చేశారు. ఆయా జీపీల పరిధిలోని గవర్నమెంట్ ఆఫీసులు, ఇతర ప్రభుత్వ బిల్డింగుల వద్ద ‘మహబూబ్నగర్ మున్సిపల్ కార్పొరేషన్’ బోర్డులు ఏర్పాటు చేయాలని ఉత్వర్వులో పేర్కొన్నారు.
ఆయా గ్రామ పంచాయతీ ప్రొఫైల్, ఆ జీపీల్లో పని చేస్తున్న ప్రభుత్వ ఉద్యోగుల వివరాలు, జీపీలకు సంబంధించిన ఆస్తులు, జీపీల డిపాజిట్లు, ఇన్వెస్టిమెంట్లు, పన్నుల వివరాలు, అక్కడ అమలవుతున్న ప్రభుత్వ స్కీములు, అక్కడ జరుగుతున్న పనులు, మెటీరియల్ బిల్లులు, గత మూడేండ్లుగా ఈ జీపీల పరిధిలో బిల్డింగులు, లే అవుట్లకు ఇచ్చిన పర్మిషన్ల వివరాలను ఫిబ్రవరి 6 లోపు ఉన్నతాధికారులకు నివేదిక ఇవ్వాలని ఉత్తర్వులో ఆదేశించారు.
మరింత స్పీడ్గా డెవలప్మెంట్..
మహబూబ్నగర్ మీదుగా ఎన్హెచ్-44, ఎన్హెచ్-167తో పాటు బైపాస్ రోడ్డు ఏర్పాటయ్యాయి. హైదరాబాద్కు సమీపంలో ఉండడంతో ఇప్పటికే కొంత డెవలప్మెంట్ జరగగా, మరింత స్పీడ్గా పాలమూరు డెవలప్ అయ్యే చాన్స్ ఉంది. ఈ క్రమంలో జాతీయ రహదారుల పొంటి రియల్ ఎస్టేట్ వ్యాపారం పుంజుకోనుంది. అయితే కార్పొరేషన్గా ఏర్పాటు కానుండడంతో ప్రతి కాలనీకి రోడ్ల సౌకర్యం, తాగునీరు, విద్య, వైద్యం, రెవెన్యూ తదితర వసతులు మెరుగుపడనున్నాయి.
అండర్ గ్రౌండ్ డ్రైనేజీ సిస్టం అందుబాటులోకి రానుంది. ట్యాక్స్లు కూడా పెరగనున్నాయి. తద్వారా ఆదాయం సమకూరడంతో పాటు రియల్ వ్యాపారం కూడా పుంజుకునే చాన్స్ ఉంది. దీనికితోడు కేంద్ర ప్రభుత్వం నుంచి ప్రత్యేక నిధులు మంజూరు కానుండడంతో పాటు రాష్ట్ర ప్రభుత్వం నుంచి కార్పస్ ఫండ్స్ కూడా రానున్నాయి. కొత్త పరిశ్రమలు వచ్చే సూచనలు ఉండడంతో ఉపాధి అవకాశాలు మెరుగుపడనున్నాయి.
