వనపర్తి, వెలుగు: ఉమ్మడి పాలమూరు జిల్లాలోని మున్సిపాలిటీల్లో ఆస్తి పన్ను వసూళ్లు అంతంతమాత్రంగానే జరుగుతున్నాయి. 19 మున్సిపాలిటీల్లో ఏడింటిలో ఆస్తి పన్ను వసూళ్లు మెరుగ్గా ఉండగా, మిగిలిన 12 మున్సిపాలిటీల్లో వసూళ్లు తక్కువగా ఉంది. ఈ నెలాఖరులోగా వంద శాతం ఆస్తి పన్ను వసూలు చేయాలని కలెక్టర్లు లక్ష్యాన్ని నిర్దేశించినా ఆశించిన ఫలితాలు కనిపించడం లేదు.
కేంద్రం నిధులు రావాలంటే..
మున్సిపాలిటీల్లో ఆస్తి పన్ను ఆశించిన స్థాయిలో వసూలైతేనే కేంద్రం నుంచి 15వ ఆర్థిక సంఘం నిధులు రిలీజ్ అవుతాయి. వనపర్తి జిల్లాలోని వనపర్తి, కొత్తకోట, పెబ్బేరు మున్సిపాలిటీల్లో ఆస్తి పన్ను నిరుటి కంటే ఎక్కువగా వసూలైంది. పట్టణాల్లో మౌలిక వసతులు కల్పించేందుకు కేంద్రం నుంచి ఈ నిధులు విడుదల అవుతాయి. వాటితో కాలనీల్లో పారిశుద్ధ్యం, డ్రింకింగ్ వాటర్, ఇతర సివిల్ వర్క్స్ చేపడతారు. గత ఆర్థిక సంవత్సరం వసూలు చేసిన ఆస్తి పన్ను కంటే 12.95 శాతం ఎక్కువగా ఉంటేనే 15వ ఆర్థిక సంఘం నిధులు రిలీజ్ చేస్తారు.
నాగర్కర్నూల్లో నిరుడు రూ.3.98 కోట్లు వసూలవగా, ఈ ఏడాది రూ.4.03 కోట్లు, అచ్చంపేటలో గత ఏడాది రూ. 2.08 కోట్లు, ఈ ఏడాది రూ. 2.11 కోట్లు, అయిజలో గత ఏడాది రూ.1.44 కోట్లు, ఈ ఏడాది రూ.1.47 కోట్లు, మక్తల్లో గత ఏడాది రూ.1.26 కోట్లు, ఈ ఏడాది రూ.1.28 కోట్లు, వనపర్తిలో గత ఏడాది రూ.4.52 కోట్లు, ఈ ఏడాది రూ. 4.92 కోట్లు, కొత్తకోటలో గత ఏడాది రూ. 84 లక్షలు, ఈ ఏడాది రూ. 99 లక్షలు, పెబ్బేరులో గత ఏడాది రూ.61 లక్షలు వసూలవగా, ఈ ఏడాది రూ.80 లక్షలు వసూలయ్యాయి.
