బెల్లంపల్లి రూరల్, వెలుగు: ఓట్లు అడిగేందుకు వెళ్లిన సిర్పూర్ఎమ్మెల్యే, అధికార పార్టీకి చెందిన కోనేరు కోనప్పకు గ్రామస్తుల నుంచి నిరసన ఎదురైంది. సిర్పూర్ నియోజకవర్గంలోని భీమిని మండలం చిన్నగుడిపేటకి ఎమ్మెల్యే కోనప్ప మంగళవారం ఎన్నికల ప్రచారానికి వచ్చారు. విషయం తెలుసుకున్న గ్రామస్తులు ఆయనను రోడ్డుపైనే అడ్డుకొని నిరసన తెలిపారు.
గత ఎన్నికల్లో రోడ్లు వేయిస్తానని హామీ ఇచ్చి ఇప్పటి వరకు ఏమీ చేయలేదని, రోడ్డుపై బైక్లను అడ్డంగా పెట్టి కోనప్పను అడ్డుకున్నారు. పోలీసులు వచ్చి వాహనాలను తొలగించినప్పటికీ గ్రామస్తులు మాత్రం ప్రచారం చేయకుండా అడ్డుపడ్డారు. చేసేదేమీలేక కోనప్ప వెనుదిరిగారు. ఈ తతంగాన్ని అంతా యువకులు వీడియో తీస్తుండగా ఎమ్మెల్యే గన్మెన్లు సెల్ఫోన్లను లాక్కొని వీడియోలను డిలీట్ చేశారు.
