- నల్ల కండువాలతో హాల్ ఎదుట బైఠాయింపు
ఇల్లందు,వెలుగు: భద్రాద్రి కొత్తగూడెం జిల్లా ఇల్లందులో మంగళవారం జరిగిన మున్సిపల్ సమావేశం రసాభాసగా మారింది. టీఆర్ఎస్ పార్టీకి చెందిన కౌన్సిలర్లు అదే పార్టీకి చెందిన చైర్మన్ తీరును నిరసిస్తూ నల్ల కండువాలతో మీటింగ్ హాల్ ఎదుట బైఠాయించి నిరసన తెలిపారు. ఇప్పటికే చైర్మన్కు వ్యతిరేకంగా మహిళా కౌన్సిలర్లు ఎస్పీ, కలెక్టర్, హ్యూమన్ రైట్స్ కమిషన్, ప్రభుత్వానికి ఫిర్యాదు చేశారు. మీటింగ్కు 11మంది అసమ్మతి కౌన్సిలర్లు నల్ల కండువాలతో హాజరయ్యారు.
సమావేశం మొదలైన వెంటనే రెండున్నర సంవత్సరాలకు సంబంధించిన మినిట్స్ బుక్ను ఇవ్వాలని కమిషనర్ను కోరారు. ఈ విషయంలో జోక్యం చేసుకున్న చైర్మన్ దమ్మాలపాటి వెంకటేశ్వర్లు మినిట్స్ బుక్ ఇప్పుడు ఇవ్వడం సాధ్యం కాదని, ఒక నెల ఆగాలని అనడంతో వారంతా వెంటనే ఇవ్వాలని కమిషనర్ను కోరారు. అనంతరం సమావేశం నుంచి వాకౌట్ చేసి మీటింగ్ హాల్ఎదుట బైఠాయించారు. ఈ సందర్భంగా వారు మాట్లాడుతూ ప్రజా సమస్యలను అధికారులకు తెలపకుండా చైర్మన్ అడ్డుకోవడం ఇబ్బందికరంగా ఉందని ఆవేదన వ్యక్తం చేశారు.
చైర్మన్ పై చేసిన ఫిర్యాదులపై విచారణ చేపట్టి న్యాయం చేయాలని కోరారు . వైస్ చైర్మన్ జానీ పాషా, కౌన్సిలర్లు కొక్కు నాగేశ్వరరావు, జేకే శ్రీనివాస్, తోట లలిత, శారద, సిలివేరు అనిత, చీమల సుజాత, సామల మాధవి, పత్తి స్వప్న, కాబోలు స్వాతి, సరిత పాల్గొన్నారు.
