- సీఎంకు పీఆర్టీయూటీఎస్ నేతల విజ్ఞప్తి
హైదరాబాద్, వెలుగు: టీచర్లకు సంబంధించిన పెండింగ్ బిల్లులను వెంటనే విడుదల చేయాలని సీఎం రేవంత్ రెడ్డిని ప్రోగ్రెసివ్ రికగ్నైజ్డ్టీచర్స్ యూనియన్ (పీఆర్టీయూ) అధ్యక్షుడు పింగిలి శ్రీపాల్ రెడ్డి, ప్రధాన కార్యదర్శి పుల్గం దామోదర్ రెడ్డి, ఎమ్మెల్సీ కూర రఘోత్తం రెడ్డి కోరారు. పెండింగ్లో ఉన్న ఐదు డీఏలతో పాటు రెండేండ్ల నుంచి పెండింగ్లో పెట్టిన జీపీఎఫ్, మెడికల్, సరెండర్ లీవ్స్, రిటైర్మెంట్ ప్రయోజనాలు, సప్లిమెంటరీ వేతనాలు, టీఎస్జీఎల్ఐ బకాయిలను వెంటనే చెల్లించాలని విజ్ఞప్తి చేశారు. బుధవారం సెక్రటేరియెట్లో సీఎం రేవంత్ రెడ్డి, మంత్రి పొంగులేటి శ్రీనివాస్ రెడ్డిని కొత్తగా ఎన్నికైన యూనియన్ అధ్యక్ష, ప్రధాన కార్యదర్శులు మర్యాదపూర్వకంగా కలిశారు. ఈ సందర్భంగా టీచర్ల సమస్యలను వారి దృష్టికి తీసుకెళ్లారు. టీచర్లకు ఏకీకృత సర్వీస్ రూల్స్ను అమలు చేయాలని, ప్రమోషన్లను చేపట్టాలని విజ్ఞప్తి చేశారు.
