శ్రీహరికోట: ఏపీలోని శ్రీహరికోటలో ఉన్న సతీశ్ ధవన్ స్పేస్ సెంటర్ (షార్) నుంచి చేపట్టాల్సిన పీఎస్ఎల్వీ- సీ59 ప్రయోగం వాయిదా పడింది. గురువారం సాయంత్రం 4.12 గంటలకు పీఎస్ఎల్వీ-సీ59 నింగిలోకి పంపేందుకు రీషెడ్యూల్ చేశామని ఇస్రో ప్రకటించింది. వాస్తవానికి బుధవారం సాయంత్రం 4.08 గంటలకే ప్రయోగం జరగాల్సి ఉంది. దాని కోసం మంగళవారం కౌంట్‌డౌన్ కొనసాగింది.
కానీ, ప్రోబా-3 స్పేస్‌క్రాఫ్ట్లో ఏర్పడిన సాంకేతిక లోపం వల్ల ప్రయోగం చివరి క్షణంలో వాయిదా పడింది. యురోపియన్ స్పేస్ ఏజెన్సీకి చెందిన ప్రోబా-3 ఉపగ్రహాలను పీఎస్ఎల్వీ–-సీ59 కక్ష్యలోకి తీసుకెళ్లనుంది. ప్రోబా-3 మిషన్లో ఒకదానితో ఒకటి అనుసంధానించబడిన 2 ఉపగ్రహాలు ఉంటాయి. ఇవి సూర్యుని వాతావరణంలోని బయటి, అత్యంత వేడి పొరను అధ్యయనం చేయనున్నాయి.
