- శ్రీతేజ్ నాన్నకు చెక్కు అందించిన నిర్మాత నవీన్
- ఈ ఘటనను ఇక రాజకీయం చేయొద్దు: మంత్రి కోమటిరెడ్డి
- సినీ ప్రముఖుల ఇండ్లపై దాడులు కరెక్టు కాదని కామెంట్
సికింద్రాబాద్, వెలుగు: సంధ్య థియేటర్ వద్ద జరిగిన తొక్కిసలాట ఘటనలో బాధిత కుటుంబానికి పుష్ప–-2 సినిమా నిర్మాణ సంస్థ మైత్రి మూవీస్ రూ.50 లక్షల సాయం అందించింది. సినిమాటోగ్రఫీ మంత్రి కోమటిరెడ్డి వెంకట్ రెడ్డితో కలిసి ఆ చిత్ర నిర్మాత నవీన్.. శ్రీతేజ్ తండ్రి భాస్కర్ కు రూ.50 లక్షల చెక్కును అందించారు. తొక్కిసలాటలో తీవ్రంగా గాయపడి సికింద్రాబాద్ కిమ్స్ ఆసుపత్రిలో చికిత్స పొందుతున్న శ్రీతేజ్ ను మంత్రి వెంకట్ రెడ్డితో కలిసి నవీన్ సోమవారం పరామర్శించారు.
బాలుడి తండ్రి భాస్కర్ కు చెక్కు అందించిన తర్వాత మంత్రి మాట్లాడారు. బాలుడు శ్రీతేజ్ ఆరోగ్యంపై డాక్టర్లను అడిగి తెలుసుకున్నానని ఆయన చెప్పారు. బాబు పరిస్థితి అంతంత మాత్రంగానే ఉందని డాక్టర్లు చెప్పారని, అతను త్వరగా కోలుకోవాలని భగవంతుడిని ప్రార్థిస్తున్నానని చెప్పారు. తొక్కిసలాట ఘటన దురదృష్టకరమని, అయితే ఈ విషయాన్ని ఇక రాజకీయం చేయవద్దని మంత్రి కోరారు. సినిమా ప్రముఖుల ఇండ్లపై దాడులు చేయడం కరెక్టుకాదన్నారు. నటుల ఇండ్లపై దాడులు చేస్తే చట్టం ఊరుకోదని, కఠిన చర్యలు తప్పవని మంత్రి హెచ్చరించారు.
నిలకడగా శ్రీతేజ్ హెల్త్
శ్రీతేజ్ ఆరోగ్య పరిస్థితులపై కిమ్స్ డాక్టర్లు సోమవారం హెల్త్ బులెటిన్ విడుదల చేశారు. బాలుడి పరిస్థితి ప్రస్తుతం నిలకడగా ఉందని, వెంటిలేటర్ సహాయం లేకుండానే ఊపిరి తీసుకుంటున్నాడని డాక్టర్ చేతన్, డాక్టర్ విష్ణుతేజ్ తెలిపారు. చాలా వరకు జ్వరం తగ్గిందని, రక్త పరీక్షల్లో తెల్లరక్త కణాలు, సీఆర్పీ లెవెల్స్ పెరుగుతున్నాయని చెప్పారు. కోలుకోవడానికి మరింత సమయం పడుతుందని తెలిపారు.
