రాష్ట్రంలో అకడమిక్, ఎంట్రన్స్, పబ్లిక్ ఎగ్జామ్స్ పెట్టడం ప్రభుత్వానికి అగ్నిపరీక్షలా మారింది. ఓవైపు ఇంటర్ ఎగ్జామ్స్ పూర్తయి పేపర్లు దిద్దే పని కూడా మొదలు కాగా, ఇప్పటికే ఆరంభమైన టెన్త్ పరీక్షలు హైకోర్టు ఆదేశాలతో సోమవారం నుంచి వాయిదా పడ్డాయి. మార్చి 30 తర్వాత హైలెవెల్ మీటింగ్లో పరిస్థితి సమీక్షించి రీ షెడ్యూల్ చేస్తారు. ఇంటర్ ఎగ్జామ్స్కి దాదాపు 10 లక్షల మంది స్టూడెంట్స్ హాజరయ్యారు. వ్యాల్యుయే షన్కి లెక్చరర్లు పెద్ద సంఖ్యలో వస్తున్నారు. దీంతో వాళ్లపై కరోనా వైరస్ ప్రభావం పడే ప్రమాదం ఉందనే ఆందోళన వ్యక్తమవుతోంది.
రాష్ట్ర ఆవిర్భావం తర్వాత 2016 ఎంసెట్ పరీక్షలు, 2019 ఇంటర్ పరీక్షలు గవర్నమెంట్ని ఉక్కిరి బిక్కిరి చేశాయి. ఆ చేదు అనుభవాల దృష్ట్యా ఈ విద్యా సంవత్సరం పరీక్షల నిర్వహణను ప్రెస్టేజ్గా తీసుకున్నారు. విద్యా శాఖ మంత్రితోపాటు ఎన్నడూ లేని విధంగా ప్రభుత్వ ప్రధాన కార్యదర్శి ఆధ్వర్యంలో పరీక్షల ఏర్పాట్లను సమీక్షించారు. కలెక్టర్ల సెల్ఫ్ ఇన్స్పెక్షన్లో ఇంటర్ పరీక్షలు సక్సెస్ఫుల్గా పూర్తయ్యాయి. టెన్త్ పరీక్షలకూ ఇదే స్ఫూర్తితో ఏర్పాట్లు చేసినా కరోనా వైరస్వల్ల పరీక్షలు వాయిదా వేయాల్సిందిగా హైకోర్టు ఆదేశించింది. సోమవారం (మార్చి23) నుంచి మార్చి 30వరకు జరగాల్సిన అన్ని పరీక్షలను వాయిదా వేస్తున్నట్టు ప్రభుత్వం ప్రకటించింది.
పరీక్షల్ని పక్కాగా నిర్వహించటం, కరెక్ట్ రిజల్ట్స్ ప్రకటించటం ద్వారానే విద్యా సంస్థలు, ప్రభుత్వం.. స్టూడెంట్స్, పేరెంట్స్ నమ్మకం పొందే ఛాన్స్ ఉంది. ఎగ్జామ్స్ రాసిన ప్రతి విద్యార్థికీ తన శక్తిసామర్థ్యాలకు అనుగుణంగానే ఫలితాలు వచ్చాయనే సంతృప్తిని కల్పించినప్పుడే పరీక్ష సంస్థల విశ్వసనీయత పెరుగుతుంది. పరీక్షల నిర్వహణలో జాతీయ స్థాయి గుర్తింపు పొందిన ఇంటర్ బోర్డు, జేఎన్టీయూహెచ్, టీఎస్పీఎస్సీ లాంటి సంస్థలు తెలంగాణ రాష్ట్ర ఆవిర్భావం తర్వాత విమర్శలపాలయ్యాయి.
గ్లోబరీనా ఎపిసోడ్.. మాయని మచ్చ
అనుభవం, అర్హత లేని గ్లోబరీనా సంస్థకు ‘ఇంటర్మీయెట్’ బాధ్యతలను అప్పగించడం, ఆ సంస్థ.. ఒప్పందం ప్రకారం ఇంటిగ్రేటెడ్ ఐటీ ప్రోగ్రామ్ని రూపొందించుకోలేకపోవడం వల్ల విద్యార్థుల సమాచార, ఫీజుల చెల్లింపు వివరాల సేకరణలో భారీగా పొరపాట్లు జరిగాయి. దీంతో పరీక్షల నిర్వహణ, పేపర్ వ్యాల్యుయేషన్ తదితర ప్రక్రియల్లో లోపాలు, ఫలితాల విశ్లేషణలో ఘోరమైన తప్పిదాలు చోటుచేసుకున్నాయి. పరీక్షలకు ముందే ఈ ప్రమాదాన్ని పసిగట్టినా బోర్డు ఆఫీసర్లు దిద్దుబాటు చర్యలు చేపట్టలేదు.
దీనికి ప్రభుత్వ ఉదాసీనత తోడవటం మొదలైన కారణాలతో ఇంటర్ బోర్డు ప్రతిష్ఠ దిగజారింది. విద్యార్థులు, తల్లిదండ్రులు తీవ్రంగా నష్టపోయారు. ఉమ్మడి ఏపీలో ప్రవేశ పరీక్షల నిర్వహణలో టాప్లో నిలిచిన జేఎన్టీయూ 2016లో ఎంసెట్ నిర్వహణలో అబాసుపాలైంది. ఎంసెట్–-2 క్వశ్చన్ పేపర్ లీకైన ఉదంతంపై జరిగిన విచారణలో.. క్రిమినల్ రికార్డ్ ఉన్న వ్యక్తులు, సంస్థల ప్రమేయంతోపాటు ప్రశ్నపత్రాల రూపకల్పనలో రూల్స్ని జేఎన్టీయూ ఆఫీసర్లు గాలికొదిలేసినట్లు ఆరోపణలు వచ్చాయి.
నలుగురిలో నానాయి
ఈ పరిణామాలతో ఎంసెట్ నిర్వహణను టీఎస్పీఎస్సీకి ఇవ్వాలని, ఇంటర్ బోర్డును ఎస్సెస్సీ బోర్డులో విలీనం చేయాలని డిమాండ్లు వచ్చాయి. గ్రూప్-–2 పరీక్ష నిర్వహణలో పొరపాట్లు, లీగల్ కేసులు, వెరసి ఫలితాల ప్రకటనలో జాప్యంతో సీఎం కేసీఆరే టీఎస్పీఎస్పీ పనితీరుపై అసంతృప్తి వ్యక్తం చేశారు. కొన్ని పరీక్షల నిర్వహణ బాధ్యతలను వేరే సంస్థలకు ఇవ్వటం మొదలైంది. అందువల్ల పోటీ, ప్రవేశ, పబ్లిక్ పరీక్షల నిర్వహణలో బాధ్యతగా ఉండాలి.
ప్రతి దశలోనూ జాగ్రత్త
పరీక్షల నిర్వహణకు ఇంటర్, సెకండరీ ఎడ్యుకేషన్ బోర్డులు సమగ్ర ప్రణాళిక.
సెక్యూరిటీ రెగ్యులేషన్స్ పాటించాలి.
సంస్థ ఏదైనా పరీక్షల నిర్వహణకు సంబంధించిన రూల్స్ దాదాపు ఒకేలా ఉంటాయి.
జనరల్ క్రిమినల్ చట్టాలతోపాటు పబ్లిక్ పరీక్షల చట్టం(25/97) ద్వారా పరీక్షల నిర్వహణని నియంత్రించొచ్చు.
పరీక్షల నిర్వహణ ప్రక్రియలను ప్రీ-–ఎగ్జామినేషన్, పోస్ట్-–ఎగ్జామినేషన్గా విభజన.
సబ్జెక్టుల వివరాల్ని తప్పులు లేకుండా విద్యా సంస్థల నుంచి సేకరణ.
ఈ డేటా ఆధారంగా పరీక్ష కేంద్రాల్ని ఏర్పాటు, హాల్ టికెట్లను, ఆన్సర్, ఓఎంఆర్ షీట్లను ప్రింట్ చేయించాలి.
ముందుగానే ఎగ్జామ్ సెంటర్లకు పంపిణీ.
పరీక్షల నిర్వహణలో అతి ముఖ్యమైన క్వశ్చన్ పేపర్ల రూపకల్పనకు బ్లూప్రింట్ని స్ట్రిక్ట్గా ఫాలో కావాలి.
క్వశ్చన్ పేపర్లు స్టూడెంట్స్ నాలెడ్జ్ని, అండర్స్టాండింగ్ కెపాసిటీని పరీక్షించేలా ఉండాలి.
ప్రశ్నపత్రాల్లో సాధ్యమైనంత వరకు అక్షర దోషాలు, అనువాద లోపాలు లేకుండా చూడాలి. సిలబస్ దాటి ప్రశ్నలు అడగకుండా, డౌటొచ్చే ప్రశ్నలు లేకుండా పూర్తి జాగ్రత్తలు తీసుకోవాలి.
-డాక్టర్ మధుసూదన్ రెడ్డి, ప్రభుత్వ జూనియర్ లెక్చరర్ల సంఘం ప్రెసిడెంట్
