ఆర్టీసీ బస్సుల్లో హాష్​ ఆయిల్ స్మగ్లింగ్ .. అంతర్రాష్ట్ర ముఠా అరెస్ట్

• 10 లీటర్ల హాష్ ఆయిల్ స్వాధీనం

మల్కాజిగిరి/మెహిదీపట్నం, వెలుగు: ఆర్టీసీ బస్సుల్లో గంజాయి, హాష్​ఆయిల్ ను స్మగ్లింగ్​చేస్తున్న అంతర్రాష్ట్ర ముఠాను రాచకొండ పోలీసులు అరెస్టు చేశారు. రూ.1.52 కోట్ల విలువ చేసే 10.2 లీటర్ల హాష్​ఆయిల్​ను స్వాధీనం చేసుకున్నారు. మంగళవారం నేరెడ్​మెట్​లోని తన ఆఫీసులో సీపీ సుధీర్​బాబు కేసు వివరాలు వెల్లడించారు. ఏపీలోని అల్లూరి సీతారామరాజు జిల్లా కోలమామిడికి చెందిన గమ్మెలి గోవిందరావు(36), రాహుల్​పేటకు చెందిన కొర్ర రాంబాబు(30) స్థానికంగా వ్యవసాయం చేస్తూ.. ఈజీ మనీ కోసం హాష్​ఆయిల్ విక్రయిస్తున్నారు. 

ఇటీవల ఒకేసారి పెద్ద మొత్తంలో డబ్బు సంపాదించాలని ప్లాన్ చేశారు. అదే ప్రాంతంలో ఉండే చంటి, లక్ష్మీనాయుడు వద్ద 10.2 లీటర్ల హాష్​ఆయిల్​కొన్నారు. ఆ మొత్తాన్ని పాలిథిన్​కవర్లలో ప్యాక్​చేసుకుని, ఈనెల 25న ఆర్టీసీ బస్సులో హైదరాబాద్​బయలుదేరారు. 26న ఉదయం యాద్రాద్రి భువనగిరి జిల్లా పరిధిలోని కొత్తగూడ ఎక్స్ రోడ్డులో దిగారు. సమాచారం అందుకున్న భువనగిరి ఎస్ఓటీ, పోచంపల్లి పోలీసులు గోవిందరావు, రాంబాబును అదుపులోకి తీసుకున్నారు. 10.2లీటర్ల హాష్​ఆయిల్​స్వాధీనం చేసుకున్నారు. బయటి మార్కెట్​లో దాని విలువ రూ.కోటి52 లక్షల20 వేలు ఉంటుందని సీపీ సుధీర్​బాబు వెల్లడించారు.

ఇబ్రహీంపట్నంలో 60 కిలోల గంజాయి

కారులో గంజాయిని తరలిస్తున్న ఇద్దరిని మహేశ్వరం ఎస్ఓటీ, ఇబ్రహీంపట్నం పోలీసులు అరెస్టు చేశారు. మహారాష్ట్రలోని నాసిక్, మాలేగావ్​కు చెందిన వాల్మిక్​ రూపా మోహితే(53) ఉల్లిగడ్డల వ్యాపారి. ఇతని వద్ద భాటు దేవరమ్​చవాన్(39)​ హెల్పర్ గా పనిచేస్తున్నాడు. వీరిద్దరూ కొన్ని నెలల కింద ఉల్లిగడ్డల లోడుతో వైజాగ్​వెజిటబుల్​మార్కెట్ కు వెళ్లారు. అక్కడ తిరుపతి అనే వ్యక్తి  గంజాయి తాగుతుండడం చూసి, ఎక్కడ దొరుకుతుందో తెలుసుకున్నారు. 

ఈజీ మనీ కోసం గంజాయి స్మగ్లింగ్​చేయాలని నిర్ణయించుకున్నారు. అందుకోసం కారు కొన్నారు. స్టేట్​మారినప్పుడల్లా కారు నంబర్​ప్లేట్లు మారుస్తూ గంజాయి స్మగ్లింగ్​చేస్తున్నారు. ఈ నెల  25న మరోసారి కారులో వైజాగ్​వెళ్లారు. 60 కిలోల గంజాయిని కొన్నారు. తిరిగొస్తుండగా హైదరాబాద్​శివారులోని ఇబ్రహీంపట్నం వద్ద పోలీసులు పట్టుకున్నారు. 30 ప్యాకెట్లుగా చేసిన 60 కిలోల గంజాయిని స్వాధీనం చేసుకున్నట్లు సీపీ సుధీర్​బాబు తెలిపారు. 

ధూల్​పేటలో 1.2కిలోలు

ధూల్​పేటలోని మాచిపురాలో దినేశ్​సింగ్ అనే వ్యక్తి గంజాయి అమ్ముతున్నాడని ఎక్సైజ్ పోలీసులకు సమాచారం అందింది. మంగళవారం ఉదయం సోదాలు నిర్వహించగా, అతని వద్ద 1.215 కేజీల గంజాయి దొరికింది. దినేశ్​తోపాటు కర్ణాటకకు చెందిన సోపన్ రావు, మహమ్మద్ సోహెల్ గంజాయి అమ్ముతున్నట్లు ఎక్సైజ్ సూపరింటెండెంట్అంజిరెడ్డి తెలిపారు. వీరిద్దరూ పరారీలో ఉన్నారు.