- రూ.45 లక్షల విలువైన 40 కిలోల గసగసాల గడ్డి, 10 గ్రాముల ఎండీఎంఏ డ్రగ్స్ సీజ్
- రాచకొండ సీపీ సుధీర్ బాబు
మల్కాజిగిరి, వెలుగు: మధ్య ప్రదేశ్ నుంచి సిటీకి డ్రగ్స్ సరఫరా చేసే అంతర్ రాష్ర్ట ముఠాను రాచకొండ పోలీసులు అరెస్టు చేశారు. నిందితుల వద్ద రూ. 45లక్షల విలువైన 40 కిలోల గసగసాల గడ్డి, 10 గ్రాముల ఎండీఎంఏ డ్రగ్స్ను స్వాధీనం చేసుకుని సీజ్ చేశారు. రాచకొండ సీపీ సుధీర్బాబు సోమవారం నేరెడ్మెట్లోని కమిషనరేట్లో మీడియాకు వివరాలు వెల్లడించారు. రాజస్తాన్ లోని జోధ్పూర్ జిల్లాకు చెందిన కార్పెంటర్ ఓంప్రకాశ్(35) ఈజీ మనీ కోసం డ్రగ్స్ అమ్ముతూ పలుమార్లు చిక్కి జైలుకు వెళ్లొచ్చిన పాత నేరస్తుడు. సిటీకి వచ్చి చందానగర్లో ఉంటూ, రెయిలింగ్పనులు చేసే సన్వాలా రామ్ (33)తో కలిసి ముఠాగా ఏర్పడ్డారు. ఈజీగా మనీ సంపాదించేందుకు డ్రగ్స్ అమ్మేందుకు ప్లాన్ చేశారు. కొద్ది నెలల కిందట వీరికి మధ్యప్రదేశ్కు చెందిన వికాస్(32) పరిచయం అయ్యాడు. దీంతో ముగ్గురూ కలిసి గసగసాల గడ్డిని అమ్మి భారీగా సంపాదించవచ్చని తెలుసుకున్నారు.
వికాస్ వద్ద డ్రగ్స్ కొనుగోలు చేసే లారీలు, బస్సులు, ట్రక్కులు, రైళ్లలో సిటీకి తెచ్చి అమ్ముతున్నారు. మళ్లీ వెళ్లి వికాస్ వద్ద 40కిలోల గసగసాల గడ్డి, 10 గ్రాముల ఎండీఎంఏ డ్రగ్స్ను కొని సిటీకి తెస్తుండగా ఎల్బీనగర్ఎస్ఓటీ , జవహర్నగర్ పోలీసులు వెళ్లి జవహర్నగర్ పీఎస్ పరిధిలోని మల్కారం వద్ద నిఘా వేశారు. నిందితులను అరెస్టు చేశారు. డ్రగ్స్తోపాటు రూ.10వేల నగదు , మూడు సెల్ఫోన్లు స్వాధీనం చేసుకుని సీజ్ చేశారు. ఓంరామ్, సన్వాల రామ్ను అరెస్టు చేసి ఎన్డీపీఎస్యాక్టు నమోదు చేశామని సీపీ చెప్పారు. పరారీలో ఉన్న వికాస్ కోసం గాలిస్తున్నట్లు చెప్పారు. నిషేధిత డ్రగ్స్ పట్ల ప్రజలు అప్రమత్తంగా ఉండాలని రాచకొండ సీపీ సుధీర్బాబు సూచించారు. డ్రగ్స్ అమ్మినా, కొన్నా అది క్షమించరాని నేరమని, పట్టుబడిన నిందితులపై ఎన్డీపీఎస్ యాక్ట్ కింద కేసులు నమోదు చేస్తే.. పదేండ్ల జైలు శిక్ష పడుతుందని తెలిపారు.
